Иқтидори сармоягузории Тоҷикистон дар Палатаи муштараки тиҷоратии Швейтсария муаррифӣ шуд

Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария Шараф Шерализода дар шаҳри Тсюрих бо Президенти Палатаи муштараки тиҷоратӣ (JCC) Николаус Колер мулоқот намуд.

Таҳлилгарони соҳаи иқтисод ин дидорро қадаме муҳим дар масири диверсификатсияи робитаҳои тиҷоратии Тоҷикистон бо кишварҳои аврупоӣ арзёбӣ мекунанд. Бино ба иттилои расмии Сафорати Ҷумҳурии Тоҷикистон дар Швейтсария, дар ҷараёни музокирот масъалаҳои марбут ба таҳкими минбаъдаи ҳамкориҳои тиҷоратӣ, сармоягузорӣ ва соҳибкорӣ, бахусус тавсеаи робитаҳои мустақим байни бахшҳои хусусии ду мамлакат мавриди баррасии амиқ қарор гирифтанд.

Дар раванди мулоқот, Шараф Шерализода афзалиятҳои иқтисодӣ ва фазои ҷолиби сармоягузории Тоҷикистонро муаррифӣ карда, имконоти васеи иштироки ширкатҳои швейтсариро дар лоиҳаҳои бузурги сармоягузории кишвар таъкид сохт. Коршиносон бар он боваранд, ки истифода аз таҷриба ва сармояи Швейтсария метавонад ба рушди бахшҳои калидии иқтисоди миллии Тоҷикистон такони ҷиддӣ бахшад.

Ҷонибҳо нақши Палатаи муштараки тиҷоратиро дар мусоидат ба барқарор намудани робитаҳои соҳибкорӣ, ташкили сафарҳои тиҷоратӣ ва баргузории чорабиниҳои робитавӣ муҳим арзёбӣ намуданд. Таваҷҷуҳи хоси нишаст ба масъалаи муаррифии васеътари имконоти сармоягузории Тоҷикистон дар байни доираҳои тиҷоратии Швейтсария равона гардид, ки ин аз ҳадафҳои стратегии Душанбе барои ҷалби сармояи аврупоӣ гувоҳӣ медиҳад.

“Рӯзгор”