Таҳкими ҳамкориҳои судию ҳуқуқӣ байни Тоҷикистон ва Ироқ

Рӯзи 29 сентябр дар шаҳри Бағдод мулоқоти Сафири Фавқулода ва Мухтори Ҷумҳурии Тоҷикистон дар Ҷумҳурии Ироқ Зубайдулло Зубайдзода бо раиси Маркази миллии ҳамкории судии байналмилалии ин кишвар Алӣ Ҳусайн Ал-Ҷаффот баргузор гардид.

Таҳлилгарони соҳаи ҳуқуқ ин дидорро қадаме муҳим дар масири таҳкими заминаҳои ҳуқуқии муносибатҳои дипломатии Душанбе ва Бағдод арзёбӣ мекунанд. Зимни мулоқоти созанда, ҷонибҳо ҳолат ва дурнамои рушди ҳамкориҳои дуҷонибаро дар соҳаи ҳуқуқ ва адлия мавриди таҳлили амиқ қарор дода, масъалаҳои марбут ба тавсеаи робитаҳои судии ду мамлакатро баррасӣ намуданд.

Дар ҷараёни музокирот, таваҷҷуҳи хос ба густариши робитаҳо байни мақомоти судӣ ва ниҳодҳои дахлдори ду кишвар, инчунин табодули таҷриба ва иттилооти ҳуқуқӣ зоҳир гардид. Коршиносон бар ин боваранд, ки эҷоди як низоми устувори табодули иттилооти касбӣ метавонад ба самаранокии ҳамкориҳои судии байналмилалӣ дар минтақа кумаки ҷиддӣ расонад.

Сарони ҳайатҳо бар аҳамияти идомаи муколамаи мустақим ва таҳкими робитаҳои касбӣ байни мақомоти салоҳиятдори Тоҷикистон ва Ироқ таъкид карда, омодагии комили худро барои истифодаи имкониятҳои мавҷуда ба хотири рушди соҳаи адлия изҳор доштанд.

“Рӯзгор”