Санкт-Петербург: Мулоқоти масъулин бо донишҷӯёни тоҷик дар заминаи тарбияи ҳуқуқӣ ва ватандӯстӣ

Масъулини Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират дар Муассисаи давлатии Коллеҷи захираҳои обии шаҳри Санкт-Петербург бо донишҷӯёни тоҷик мулоқоти созанда доир намуданд.

Таҳлилгарони соҳаи маориф ва муҳоҷират бар ин боваранд, ки ташкили чунин ҳамоишҳо барои ҳифзи ҳуқуқии ҷавонони мо дар хориҷи кишвар муҳим мебошад. Ин муассисаи таълимӣ, ки айни замон беш аз 50 нафар шаҳрвандони Тоҷикистон дар он ба таҳсил фаро гирифта шудаанд, барои омода намудани кадрҳои коргарии рақобатпазир мутобиқ ба бозори меҳнати Русия фаъолият мекунад.

Зимни мулоқоти ошкоро бо донишҷӯён, масъалаҳои калидии марбут ба талаботи қонунгузории кунунии будубош, сари вақт ба расмият даровардани ҳуҷҷатҳо ва танзими дурусти раванди таҳсил мавриди баррасӣ ва фаҳмондадиҳӣ қарор гирифтанд. Таваҷҷуҳи махсуси ташкилкунандагони нишаст ба пешгирии ҳолатҳои ҷинояткорӣ дар байни ноболиғону ҷавонон ва муқовимат ба гаравиши онҳо ба гурӯҳҳои ифротгаро ва ҳаракатҳои тундгарои динию мазҳабӣ нигаронида шуд.

Дар бахши дигари соатҳои тарбиявӣ, масъулин ба донишҷӯён масъалаҳои нигоҳдории саломатӣ, пешгирӣ аз бемориҳои сироятӣ ва риояи қоидаҳои санитарию гигиениро шарҳ доданд. Дар фарҷоми вохӯрӣ, ба ҷавонон тавсия дода шуд, ки дар баробари тарбияи ватандӯстӣ ва эҳтироми арзишҳои миллию давлатии худ, ба фарҳанг, таърих ва қонунгузории давлати иқомат низ эҳтироми хоса зоҳир намоянд.

“Рӯзгор”