ҲАЗОРОН МАРГ ДАР ҶОДАҲОИ ТОҶИКИСТОН

Дар даҳ соли ахир дар ҷодаҳои Тоҷикистон беш аз 15.000 садама рух додааст ва ин садамаҳо ҷони тақрибан 5.000 нафарро бурдаанд. Назорати нақлиёт ва мухобироти Тоҷикистон гуфтааст, дар давоми солҳои 1998-2008 дар роҳҳои Тоҷикистон тақрибан 16.000 садама ба қайд гирифта шудааст ва ин садамаҳо 4.682 кушта ва 18.948 маҷрӯҳ ба ҷой гузоштаанд.

Созмони ҷаҳонии беҳдошт гуфтааст, 70 дарсади садамаҳои нақлиётӣ дар маҳдудаи кишварҳои аврупоии ин созмон ба кишварҳои фақир рост меояд. Ҷамоҳири Осиёи Марказӣ низ расман вориди ҳамин маҳдудаи аврупоии Созмони ҷаҳонии беҳдошт мебошанд. Дар як гузориши ин созмон гуфта шудааст, дар ин маҳдуда солона 120.000 нафар ҷони худро бар асари садамаҳои нақлиётӣ аз даст медиҳанд ва тақрибан нисфи ин қурбониён пиёдагардҳо, мотосиклронон ва велосипедронҳо мебошанд.

Дар ин гузориш таъкид шудааст, ки қариб дар ҳар саввумин кишвари ин маҳдуда суръати мошинҳо дар роҳҳои шаҳрҳо ба таври муассир контрол намешавад. Дар ҳар ҳафтумин кишвар қоидаҳои марбут ба сатҳи иҷозаёфтаи алкоҳол дар хуни ронанда мавҷуд набудааст. Даҳ дарсади ин кишварҳо қонунҳои истифодаи ҳатмӣ аз тасмаи бехатариро надоштаанд. Истифодаи ҳатмӣ аз тасмаи бехатарӣ дар Тоҷикистон дар ҳамин авохир ҷорӣ шудааст.