Аз Қатъномаи СММ то Конфронси Душанбе-2027: Гузориши ҳайати Тоҷикистон дар САҲА

Дар ҷаласаи 24-уми тирамоҳии Ассамблеяи парлумонии САҲА мавқеи Тоҷикистон оид ба амнияти рақамӣ ва ташаббусҳои глобалии кишвар муаррифӣ гардид.

Вакили Маҷлиси намояндагони Маҷлиси Олии Ҷумҳурии Тоҷикистон ва роҳбари ҳайати парлумонии мамлакат дар Ассамблеяи парлумонии Созмони амният ва ҳамкорӣ дар Аврупо (САҲА) Маҳмадшоҳ Гулзода дар ҷаласаи 24-уми тирамоҳии ин ниҳод иштирок намуд.

Нишасти мазкур дар шаҳри Андорра бо ҳузури беш аз 170 вакили парлумон аз 49 давлати аъзои созмон баргузор шуд. Дар он масъалаҳои мураккаби риояи уҳдадориҳои байналмилалӣ дар шароити танишҳои геополитикӣ, таҳкими амнияти энергетикӣ ва муқовимат ба таҳдидҳои кибериву гибридӣ ва хатарҳои зеҳни сунъӣ (AI) мавриди баррасӣ қарор гирифтанд.

Мавқеи Тоҷикистон: Зеҳни сунъӣ ва амнияти фазои рақамӣ

Маҳмадшоҳ Гулзода зимни суханронии худ мавқеи устувори Тоҷикистонро оид ба истифодаи масъулонаи зеҳни сунъӣ, ҳифзи ҳуқуқу озодиҳои инсон ва пешгирии табъиз дар фазои рақамӣ баён дошт. Роҳбари ҳайат аз саҳми фаъоли Тоҷикистон ва ташаббусҳои ҷаҳонии Президенти Ҷумҳурии Тоҷикистон муҳтарам Эмомалӣ Раҳмон ёдовар шуд:

- Қабули қатъномаи Маҷмаи Умумии СММ оид ба «Нақши зеҳни сунъӣ дар фароҳам овардани имконоти навин барои рушди устувор дар Осиёи Марказӣ» бо ташаббуси Тоҷикистон.

- Ташаббуси эълон намудани 31 август ҳамчун Рӯзи байналмилалии зеҳни сунъии бехатар, ҳифзшуда ва боэътимод.

Раванди Душанбе ва Конфронси соли 2027

Дар ҳамоиш ба аҳаммияти таҳкими ҳамкории байналмилалӣ дар мубориза бо терроризм, экстремизм ва ҷиноятҳои киберӣ таваҷҷуҳи махсус зоҳир карда шуд. «Раванди Душанбе оид ба мубориза бо терроризм ва маблағгузории он» ҳамчун яке аз механизмҳои муҳимми ҳамоҳангии ҷаҳонӣ арзёбӣ гардид.

Таъкид шуд, ки баргузории Конфронси байналмилалии сатҳи баланд оид ба мубориза бо терроризм, ки соли 2027 дар шаҳри Душанбе ба нақша гирифта шудааст, барои таҳкими талошҳои муштарак дар муқобили таҳдидҳои муосири фаромарзӣ заминаи мусоид хоҳад гузошт.

“Рӯзгор”