Имконоти сармоягузорӣ ва содиротии Тоҷикистон дар Минск муаррифӣ шуд
Рӯзи 19 ноябр бо ташаббуси Сафорати Тоҷикистон дар Беларус ва дар ҳамкорӣ бо Кумитаи иҷроияи ноҳияи Фрунзеи шаҳри Минск ҳамоиши иқтисодӣ оид ба тақвияти робитаҳои тиҷоратию сармоягузорӣ миёни Тоҷикистон ва Беларус баргузор гардид.
Бино ба иттилои Сафорати Тоҷикистон дар Минск, дар ин чорабинӣ намояндагони ниҳодҳои давлатӣ ва доираҳои соҳибкорию сармоягузории Беларус ширкат варзиданд.
Дар ҷараёни ҳамоиш ба масъалаҳои калидии зерин таваҷҷуҳи махсус зоҳир карда шуд:
- Имконоти иқтисодию сармоягузории Тоҷикистон, шароити мусоиди соҳибкорӣ ва дурнамои ҳамкориҳои судманд дар соҳаҳои саноат, кишоварзӣ, савдо, нақлиёт ва логистика муаррифӣ шуданд.
- Масъалаи ба роҳ мондани лоиҳаи Хонаи савдои Тоҷикистон дар шаҳри Минск ҳамчун абзори муҳим барои намоиши молу маҳсулоти ватанӣ, афзоиши содирот ва ворид намудани маҳсулоти истеҳсолкунандагони тоҷик ба бозори Беларус баррасӣ гардид.
- Зарурати густариши ҳамкориҳои мустақим миёни соҳибкорони ду кишвар, дарёфти шарикони нав ва татбиқи лоиҳаҳои муштараки истеҳсолию сармоягузорӣ таъкид карда шуд.
Дар фарҷоми ҳамоиш ҷонибҳо омодагии худро барои идомаи муколамаи созанда ва андешидани тадбирҳои амалӣ ҷиҳати истифодаи пурраи зарфиятҳои иқтисодии Тоҷикистону Беларус изҳор доштанд.
“Рӯзгор”
















