Боку: Имконоти сармоягузории Тоҷикистон дар меҳвари таваҷҷуҳи Форуми байналмилалӣ

Дирӯз дар шаҳри Бокуи Ҷумҳурии Озарбойҷон Форуми дуюми байналмилалии сармоягузории Озарбойҷон таҳти унвони амиқи «Барқарорсозии эътимод дар шароити ҷаҳони пароканда: Қафқози Ҷанубӣ ҳамчун такягоҳи ҳамбастагии ҷаҳонӣ ва суботи сармоягузорӣ» доир гардид. Дар ин ҳамоиши сатҳи баланд аз Тоҷикистон Вазири рушди иқтисод ва савдо Абдураҳмон Абдураҳмонзода иштирок намуд.

Таҳлилгарони иқтисодӣ бар ин боваранд, ки ҳузури Тоҷикистон дар ин форум барои муаррифии иқтидори иқтисодии кишвар дар марҳалаи нави геоиқтисодӣ муҳим мебошад. Намояндаи расмии Тоҷикистон дар баромад ва музокироти худ имконоти фарохи сармоягузорӣ ва самтҳои афзалиятноки рушди иқтисоди миллиро ба доираҳои тиҷоратии ҷаҳонӣ муаррифӣ кард. Инчунин оид ба иқдомҳои пайваста ва стратегии Ҳукумати Ҷумҳурии Тоҷикистон дар самти такмили фазои сармоягузорӣ ва эҷоди имтиёзҳо маълумоти муфассал пешниҳод гардид.

Дар ҷараёни форум ба таври махсус таъкид шуд, ки рушди инфрасохтори муосир, тавсеаи дастрасии Тоҷикистон ба бозорҳои минтақавӣ ва байналмилалӣ, инчунин омодасозӣ ва татбиқи лоиҳаҳои бузурги сармоягузорӣ дар минтақаҳои озоди иқтисодӣ (МОИ) аз самтҳои калидӣ ва устувори сиёсати иқтисодии мамлакат ба ҳисоб мераванд.

Коршиносон қайд мекунанд, ки таваҷҷуҳи хоси иштирокчиёни форум ба имконоти мавҷудаи Тоҷикистон ҷалб гардид, ки ин заминаро барои ҷалби бештари сармоя ва татбиқи лоиҳаҳои муштараки судманд дар соҳаҳои мухталифи иқтисоди кишвар фароҳам месозад.

“Рӯзгор”