Душанбе мизбони Форуми сеюми соҳибкории Осиёи Марказӣ ва Амрико (B5+1) мегардад

Дар Иёлоти Муттаҳидаи Амрико масъалаи омодагӣ ба ҳамоиши азими иқтисодӣ, ки моҳи апрели соли 2027 дар пойтахти Тоҷикистон доир мешавад, мавриди баррасии ҷиддӣ қарор гирифт.

Масъалаи омодагӣ ба Форуми сеюми соҳибкории кишварҳои Осиёи Марказӣ ва Амрико (B5+1), ки моҳи апрели соли 2027 дар шаҳри Душанбе баргузор мегардад, зимни як ҳамоиши расмӣ дар шаҳри Вашингтон баррасӣ карда шуд.

Тибқи иттилои Кумитаи давлатии сармоягузорӣ ва идораи амволи давлатии Ҷумҳурии Тоҷикистон, дар ин нишасти муҳим Раиси Кумита Султон Раҳимзода, сафирони кишварҳои Осиёи Марказӣ, намояндагони ниҳодҳои давлатии Амрико ва доираҳои соҳибкорӣ иштирок намуданд.

Раиси Кумита Султон Раҳимзода зимни баромади худ омодагии комили Тоҷикистонро барои мизбонии ин форуми баландпоя таъкид намуда, иброз дошт, ки ҳамоиши мазкур барои таҳкими ҳамкории иқтисодию сармоягузорӣ ва рушди бахши хусусӣ дар минтақа аҳамияти калон дорад.

Самтҳои афзалиятноки Форуми Душанбе-2027

Дар доираи ҳамоиши Вашингтон самтҳои асосӣ ва афзалиятноки Форуми ояндаи Душанбе муаррифӣ шуданд, ки бахшҳои зеринро фаро мегиранд:

- Рушди заминаҳои зеҳни сунъӣ (AI) ва технологияҳои иттилоотӣ.

- Густариши бахшҳои финтех (технологияҳои молиявӣ) ва тиҷорати электронӣ.

- Ҳамкорӣ ва сармоягузорӣ дар самти маъданҳои стратегӣ.

Интизор меравад, ки Форуми B5+1 дар шаҳри Душанбе ба густариши робитаҳои тиҷоратӣ, ҷалби сармоягузории мустақими хориҷӣ ва таҳкими шарикии устувори иқтисодӣ байни кишварҳои Осиёи Марказӣ ва Иёлоти Муттаҳидаи Амрико мусоидати фаъол хоҳад кард.

“Рӯзгор”