Мулоқоти Сироҷиддин Муҳриддин бо Дабири кулли Созмони ҳамкории рақамӣ

Дар доираи ҳафтаи сатҳи баланди иҷлосияи 81-уми Маҷмаи умумии Созмони Милали Муттаҳид мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо Дабири кулли Созмони ҳамкории рақамӣ (DCO) хонум Дима Ал Яҳя баргузор гардид.

Таҳлилгарони соҳаи технологияҳои муосир ин дидорро барои ояндаи рақамисозии иқтисоди Тоҷикистон муҳим арзёбӣ мекунанд. Бино ба иттилои Вазорати корҳои хориҷии кишвар, ҷонибҳо вазъи ҷории робитаҳо ва дурнамои густариши ҳамкориҳоро дар самти рушди рақамӣ мавриди баррасӣ қарор дода, роҷеъ ба сафари дарпешистодаи хонум Дима Ал Яҳя ба шаҳри Душанбе табодули назар намуданд.

Дар ҷараёни музокирот, Сироҷиддин Муҳриддин афзалиятҳои стратегии Тоҷикистон, аз ҷумла қатномаҳои пешниҳодкардаи кишварро дар Маҷмаи Умумии СММ дар самти зеҳни сунъӣ муаррифӣ кард. Коршиносон таъкид мекунанд, ки Душанбе бо ин қадамҳо мехоҳад мавқеи худро ҳамчун кишвари пешгом дар танзими ҳуқуқии технологияҳои нави минтақавӣ мустаҳкам намояд.

Ҳамчунин, сарони ҳайатҳо имконоти ҳамкориҳои муштаракро дар бахшҳои калидӣ, мисли инфрасохтори рақамии давлатӣ, амнияти киберӣ, рушди малакаҳои рақамии ҷавонон ва дастгирии стартапҳои технологӣ мавриди муҳокимаи ҷиддӣ қарор доданд.

“Рӯзгор”