Нишасти Қоҳир Расулзода ва Марат Хуснуллин дар Душанбе

Имрӯзҳо муносибатҳои иқтисодӣ ва тиҷоратии Тоҷикистон ва Русия ба унвони шарикони стратегӣ марҳалаи сифатан нави рушдро паси сар мекунанд. Дирӯз, 1 октябр, дар шаҳри Душанбе ҷаласаи навбатии Комиссияи байниҳукуматии Ҷумҳурии Тоҷикистон ва Федератсияи Русия оид ба ҳамкории иқтисодию тиҷоратӣ таҳти раёсати Сарвазири кишвар Қоҳир Расулзода ва муовини Раиси Ҳукумати Русия Марат Хуснуллин баргузор гардид.

Таҳлилгарони соҳаи иқтисод бар ин боваранд, ки ин нишаст заминаро барои иҷрои дастурҳои созандаи сарони ду давлат ва истифодаи комил аз иқтидорҳои мавҷуда таҳким мебахшад. Омори расмии тиҷоратӣ гувоҳи равшани ин тамоюли устувор аст; гардиши савдои хориҷӣ байни ду кишвар дар соли 2025 ба 2 миллиарду 472,5 миллион доллар расида, афзоиши 24,8-фоизиро сабт карда буд.

Коршиносон таъкид мекунанд, ки ин ҷаҳиши иқтисодӣ дар соли 2026 низ босуръат идома дорад. Танҳо дар ҳашт моҳи аввали соли ҷорӣ (январ–август) ҳаҷми мубодилаи мол миёни Душанбе ва Маскав 1 миллиарду 676,5 миллион долларро ташкил дод, ки нисбат ба ҳамин давраи соли қаблӣ 16,4 фоиз зиёд мебошад.

Соҳибназарони соҳаи геоиқтисод қайд мекунанд, ки Федератсияи Русия ҳамасола мавқеи аввалро дар сохтори ҷуғрофии савдои хориҷии Тоҷикистон устувор нигоҳ медорад. Ин нишондиҳандаҳо собит месозанд, ки заминаҳои эътимоди мутақобила ва равобити созандаи ду кишвар дар соҳаи сармоягузорию тиҷорат тадриҷан рӯ ба афзоиш дорад.

“Рӯзгор”