Нақшаҳои стратегии СҲИ барои солҳои оянда: Дабири кулли нав барномаи худро муаррифӣ кард

Дар Подшоҳии Арабистони Саудӣ нишасти дастҷамъонаи Сафири Тоҷикистон ва намояндагони доимии кишварҳои аъзо бо роҳбарияти тозаинтихоби Созмони ҳамкории исломӣ баргузор гардид.

Сафири Фавқулода ва Мухтори Ҷумҳурии Тоҷикистон дар Подшоҳии Арабистони Саудӣ ва Намояндаи доимии кишвар дар назди Созмони ҳамкории исломӣ (СҲИ) Акрам Каримӣ дар якумин нишасти дастҷамъонаи Дабири кулли тозаинтихоби созмон Исмоил валад Шайх Аҳмад бо намояндагони доимии давлатҳои аъзо иштирок намуд.

Тавре ки аз Сафорати Ҷумҳурии Тоҷикистон дар Подшоҳии Арабистони Саудӣ хабар доданд, ин ҳамоиши дипломатӣ заминаеро барои муаррифии нақшаҳои стратегии ояндаи созмон фароҳам овард.

Зимни нишасти мазкур Дабири кулли Созмони ҳамкории исломӣ самтҳои асосии фаъолият ва барномаҳои худро муаррифӣ кард, ки масъалаҳои зеринро дар бар мегиранд:

- Муаррифии барномаи мукаммал оид ба мудирияти самарабахши созмон барои солҳои оянда.

- Таҳкими робитаҳои бисёрҷониба байни котибот ва намояндагони доимии давлатҳои аъзои СҲИ.

- Тарҳрезии механизмҳои муштарак барои вокуниш ба чолишҳои фазои ҷаҳони ислом.

Ҷумҳурии Тоҷикистон ҳамчун аъзои фаъоли СҲИ минбаъд низ ҷиҳати татбиқи ҳадафҳои созандаи созмон ва густариши робитаҳои мутақобилан судманд бо ниҳодҳои соҳавии он саҳми муносиб хоҳад гузошт.

“Рӯзгор”