ИТТИҲОДИ АВРУПО: ҲУҚУҚИ МУҲОҶИРОНИ МЕҲНАТӢ ДАР МАРКАЗИ ТАВАҶҶӮҲ

Имрӯз, 26-уми июл, дар толори ҷаласаҳои меҳмонхонаи «Ҳайят Риҷеси»-и шаҳри Душанбе бо ибтикори Намояндагии Иттиҳоди Аврупо дар Тоҷикистон семинари дурӯзаи байналмилалӣ дар мавзӯи «Ҳуқуқи муҳоҷирони меҳнатӣ» ба кори худ сар кард.

Семинар дар чаҳорчӯбаи Муколамаи Иттиҳоди Аврупо ва Ҳукумати Тоҷикистон оиди ҳуқуқи инсон гузаронида мешавад. Он намояндагони ҷомеаи шаҳрвандӣ, мақомоти давлатӣ ва ташкилоти байналмилалӣ, ки дар Тоҷикистон фаъолият мекунанд, бо мақсади муҳокимаи масоили мавҷуди муҳоҷирати меҳнатӣ ба ҳам гирд меорад.

Ба ин чорабинӣ инчунин коршиносони дараҷаи байналхалқӣ оиди масоили муҳоҷират, намояндагони ташкилоти байналмилалии хориҷи кишвар ва ташкилоти ғайридавлатӣ низ даъват шудаанд. Дар назар аст, ки аз рӯи натоиҷи семинар ба Ҳукумати Тоҷикистон барои беҳтар кардани кор дар ин самт тавсияҳо дода мешаванд.