ПОНЗДАҲ ДАР САДИ КОРХОНАҲОИ ТОҶИКИСТОН АЗ КОР МОНДАНД

Имсол аз фаъолият бозмондани понздаҳ дар сади корхонаҳои саноатии Тоҷикистон боиси 700 миллион сомонӣ кам истеҳсол гардидани маҳсулоти саноатӣ гардид.

Шариф Раҳимзода, вазири рушди иқтисод ва савдои кишвар сабаби аз кор мондани ин корхонаҳоро ба кӯҳнашавии онҳо, ки аз замони Шӯравӣ боқӣ мондаанд рабт дод: «Асосан ин корхонаҳо аз замони Шӯравӣ мондаанд ва технологияашон кӯҳна шудааст. Бо сабаби харҷи зиёди нақлиётӣ шарикони иқтисодии онҳо дар дигар кишварҳо, аз ҷумла дар Русия, Қазоқистон аз байн рафтанд».

Вазири рушди иқтисод ва савдо илова намуд, ки ҳарчанд ин корхонаҳо фаъолият надоранд, вале ҳамчун корхона айни ҳол дар рӯйхат вуҷуд доранд. Бархе аз соҳибназарон мегӯянд, иллати  қатъ гардидани фаъолияти корхонаҳо ин бемасъулятии соҳибони онҳо мебошад.

Зеро ба қавли ин гурӯх коршиносон баъди пош хурдани Иттиҳоди Шӯравӣ аксари корхонаҳои саноатӣ ба дасти нафароне афтод, ки чандон мутахассиси соҳа набуданд ва дар натиҷаи талаву тороҷ корхонаҳоро аз фаъолият бозмонданд.

Темур Раҷабализода, «Рӯзгор»