Поёни як даврони таърихӣ: Лионел Месси тими миллии Аргентинаро тарк кард

Қаҳрамони футболи ҷаҳон Лионел Месси бо як изҳороти такондиҳанда эълон кард, ки дигар ҳеҷ гоҳ ба майдон бо либоси тими миллӣ намебарояд. Ин анҷоми як даврони таърихӣ ва афсонавӣ аст, ки ба мардуми Аргентина як ҷаҳон лаҳзаҳои пурҳаяҷону драмавӣ ва дар айни замон шодию нишот бахшида буд. Акнун ин ҳама ба таърих пайваст, вале мухлисон муъҷизаҳои ин аргентинии бузургро дар майдони футбол солу замонҳои тӯлонӣ фаромӯш нахоҳанд кард.

Нокомиҳо дар мунтахаб ва набарди ғоибона бо Роналду

Месси дар давоми тамоми даврони варзишиаш бо Криштиану Роналду рақобати ғоибона мебурд. Албатта, ин талошҳо бештар бо ташаббуси ҳаводорони ҳарду футболбоз сурат мегирифт, дар ҳоле ки худи онҳо ҳамеша ба ҳамдигар эҳтироми хос доштанд. Сарфи назар аз ин, ин дуэл таъсири худро дошт ва баъд аз қаҳрамонии Португалия дар Евро-2016, бархе бар ин бовар шуданд, ки Роналду аз Месси пеш гузаштааст.

Бар болои ин, даврони дурахшони ҳарду футболбоз ба марҳалаи ниҳоӣ наздик мешуд ва сабқати ҷаҳонӣ дар Русия барои Месси шояд охирин шонси исботи он буд, ки ӯ қодир аст мунтахабро ба унвони деринтизори қаҳрамонӣ бирасонад. Вале дар ҶҶ-2018 роҳи аргентиниҳоро Фаронса баст; бо вуҷуди шиддатноку олӣ гузаштани ин дидор, шогирдони Дидие Дешам ба пеш рафтанд ва дар ниҳоят косибӣ ҷом шуданд. Лионел бошад, он замон ҳатто дар Кубоки Америка зафар наёфта буд.

Тӯли ин солҳо ҳар бор дар лаҳзаҳои сарнавиштсоз тими Аргентина ба нокомиҳои драмавӣ дучор мешуд ва гоҳе Лео пеналтиҳои ҳаётиро ба ҳадаф расонида наметавонист, ки ин танҳо боиси афзудани мавҷи танқидҳо аз ҷониби бадхоҳонаш мегашт. Ҳатто даврае пеш омад, ки Месси эълони тарки мунтахаб кард, вале дубора ба қарори худ бозгашт. Ин тасмим, бешак, яке аз оқилонатарин қадамҳо дар зиндагии варзишии ӯ ба шумор меравад.

Пирӯзиҳои дурахшон ва бузургии бепоён

Соли 2021 дар Бразилия мунтахаби Аргентина ҳамроҳ бо Месси, бахту иқбол ба рӯяшон хандиду Кубоки Америкаро соҳиб шуд ва сипас бо як ҷаҳон таассуроти нек озими Ҷоми ҷаҳон дар Қатар гашт. Дастаи Лионел Скалони муддаии асосии қаҳрамонӣ маҳсуб намеёфт. Шояд танҳо ангуштшумор нафарон онро дар сегонаи аввали тимҳои қудратманд медиданд. Вале дар амал кор тамоман ранги дигар гирифт.

Аргентиниҳо тамоми давраи мусобиқаро бо шукӯҳу шаҳомати хос тай карданд, ки дар ин миён Месси дар 35-солагӣ бозии дастаро гоҳе танҳо ба дӯши худ мекашид. Ӯ сад дар сад ситораи дурахшони тими худ буд ва дар он финали пуртазоду аҷиб дар баробари Фаронса унвони қаҳрамонии ҷаҳонро ба Аргентина ҳадя намуд. Корномаи ӯ ҷойи баҳсеро барои бузургиаш боқӣ нагузошт. Ҳатто сарсахттарин шаккокон низ сар фуруд оварда, иқрор шуданд, ки Месси, ба эҳтимоли зиёд, бузургтарин футболбози таърихи башарият аст.

Боиси тааҷҷуб аст, ки пас аз он сабқати зафарбор ӯ даврони бозиашро дар мунтахаби миллӣ хотима набахшид. Сарфи назар аз он ки гӯё тамоми шароит барои рафтани ӯ муҳайё буд. Зеро аз майдон дар авҷи шӯҳрату комёбӣ бояд рафт ва фурсате аз ин муносибтарро гумон буд тасаввур кард. Вале дар ниҳоди Месси шавқу ҳаваси дуборае барои ҳунарнамоӣ дар арсаи ҷаҳонӣ ҷӯш зад ва ҳамин буд, ки соли 2024 унвони дуюми қаҳрамониро дар Кубоки Америка бо пироҳани Аргентина ба даст овард.

Меросе, ки ҳанӯз касе аҳамияти онро амиқ дарк накардааст

Вай пас аз ин озими сабқати навбатии ҷаҳонӣ гашт, ки ин маротиба дар ИМА, Канада ва Мексика ҷараён гирифт. Лео дар ҷараёни ин мусобиқа ба синни 39-солагӣ қадам гузошт, вале бо вуҷуди ин синну сол, боз ҳам яке аз бозингарони калидию беҳтарини корез ба шумор мерафт. Мунтахаби Аргентина боз ҳам бештар бо шарофати заҳматҳои ӯ то ба даври финалӣ роҳ хат кард ва он ҷо дар вақти изофӣ бозиро ба Испания бохт. Ин аллакай нуқтаи ниҳоии расмӣ дар даврони дурахшони Месси буд, ки худи ӯ имрӯз дар ин бора расман ба ҷаҳониён хабар дод.

«Пас аз сипарӣ шудани фурсати зиёд аз финали Ҷоми ҷаҳон ва пас аз мулоҳизаҳои тӯлонӣ, мехоҳам ба ҳамагон эълон намоям, ки мунтахаби миллиро тарк мекунам. Ин тасмими ниҳоят сангину дардовар буд ва ҳанӯз ҳам ин дардро дар умқи дилам ҳис мекунам, вале медонам, ки маҳз ҳоло лаҳзаи рафтан аст. Савганд ёд мекунам, ки ман ҳамеша тамоми ҳастиамро нисор мекардам — на танҳо дар чанд соли охир, ки пайиҳам зафар ёфтем, балки дар гузашта низ. Ман ҳамеша ба хотири ин пироҳан ҷонбозӣ мекардам, то ба шумо хушбахтӣ бахшам ва боиси ифтихори ҳар як аргентинӣ бошам. Барои он ҳама меҳру муҳаббате, ки тӯли 20 соли охир ба ман арзонӣ доштед, сипосгузорам. Акнун ман ҳам ба сафи шумо — ҳаводорон мепайвандам ва ин тими маҳбубро ҳам дар лаҳзаҳои шодӣ ва бахусус дар рӯзҳои сахтӣ, бо тамоми вуҷуд дастгирӣ хоҳам кард», — омадааст дар паёми Месси дар шабакаҳои иҷтимоӣ.

Ин нобиғаи аргентинӣ иқрор шуд, ки тасмими мазкурро ҳамагӣ ду рӯз пас аз финали Ҷоми ҷаҳон гирифта буд ва даргузашти падар танҳо ӯро ба ҳақ будани ин қадам мутмаин сохт. Даврони таърихӣ воқеан ҳам ба поён мерасад, вале Лионел ҳамоно дар MLS ҳунарнамоии дурахшони худро давом дода, айни замон садри рӯйхати нишонзанҳои мавсимро аз они худ кардааст. Танҳо дар даври гузашта Месси ба задани покер (чор гол) даст ёфт ва тими ӯ, «Интер Майами», яқинан барои унвони қаҳрамонӣ то охир меҷангад. Месси маҳз бо ҳамин хислаташ Месси аст. Ӯ ҳама корро ба нуқтаи ниҳоӣ мерасонад, аммо шаҳомату бузургии ӯро бисёр нафарон танҳо пас аз гузашти солҳои тӯлонӣ амиқ эҳсос хоҳанд кард.

“Рӯзгор”