ҶҶ 1986: Тасхири Мексика ва тоҷгузории подшоҳ

Чемпионати ҷаҳонии соли 1986, ки аз 31 май то 29 июн дар Мексика баргузор шуд, на танҳо як мусобиқаи футболӣ, балки як намоиши ҳақиқии ҳунар ва иродаи инсонӣ буд. Ин ҷоизаи сездаҳум дар таърих буд ва онро бешубҳа метавон "Чемпионати Диего Марадона" номид, зеро ин бозигари нобиға дар саҳнаи Мексика ба авҷи шӯҳрати худ расид.

Мексика баъди он ки Колумбия аз мизбонӣ даст кашид, майдони ин мусобиқа интихоб шуд ва аввалин кишваре гардид, ки ду маротиба қаблан соли 1970 мизбони Ҷоми ҷаҳон мешуд. Сарфи назар аз заминларзаи сахти соли 1985, ки ба шаҳри Мехико зарари калон расонд, мексикагиҳо бо иродаи пӯлодӣ тамоми варзишгоҳҳоро барқарор карданд ва мусобиқаро дар сатҳи олӣ баргузор намуданд. 24 даста дар 6 гурӯҳ ба мубориза бархостанд ва ҳар гурӯҳ 4 дастаро дар бар мегирифт. Формат низ тағйир ёфт: аз 24 даста, 2 дастаи беҳтарин аз ҳар гурӯҳ ва 4 дастаи беҳтарини сеюм ба марҳилаи плей-офф роҳ ёфтанд.

Ин Чемпионат барои бисёр дастаҳо таърихӣ буд: Канада, Дания ва Ироқ бори аввал дар Ҷоми ҷаҳон ширкат карданд. Дастаи Иттиҳоди Шӯравӣ низ бо роҳбарии Валерий Лобановский дар гурӯҳи C бо ҳисоби 6:0 Венгрияро шикаст дод ва ҳамаро ба ҳайрат овард.

Аммо қаҳрамони асосии ин мусобиқа, албатта, Диего Марадона буд. Вай дар бозии чорякфинал бар Англия дар тӯли чанд дақиқа ду голе зад, ки то абад дар таърих сабт шуданд. Аввалро вай бо даст зада, ки баъдҳо бо номи "Дасти Худо" машҳур шуд ва сипас голи дуюмро пас аз шикастани панҷ бозигари англис ва дарвозабон зада, ки ФИФА онро "Голи аср" эътироф кард. Ин ду ҳодиса на танҳо Марадонаро ба ситораи бебаҳои мусобиқа табдил дод, балки ӯро дар мақоми яке аз бузургтарин бозигарони таърих ҷойгир кард.

Дар финал, ки 29 июн дар варзишгоҳи афсонавии «Ацтека»-и Мехико бо иштироки 115 ҳазор тамошобин баргузор шуд, Аргентина бо Олмони Ғарбӣ рӯ ба рӯ шуд. Аргентина дар нимаи аввал бо голи Хосе Браун ва дар нимаи дуюм бо голи Хорхе Валдано 2:0 пеш афтод. Аммо олмониҳо бо голҳои Карл-Ҳайнц Румменигге ва Руди Фёллер дар дақиқаҳои 74 ва 81 ҳисобро баробар карданд. Дар лаҳзаҳои охири бозӣ, Ҷорхе Бурручага пас паси тӯби Марадона дар дақиқаи 84-юм голи пирӯзиро зада, Аргентинаро бо ҳисоби 3:2 ба пирӯзӣ расонд. Ин пирӯзӣ барои Аргентина дувумин қаҳрамонии ҷаҳон буд ва онҳо бори навбатӣ танҳо 36 сол баъд, дар соли 2022 ба ин дастовард расиданд.

Марадона дар ин мусобиқа панҷ гол зада, панҷ голедоварӣ низ анҷом дод ва ҳамчун беҳтарин бозигар эътироф шуд. Гарри Линекер аз Англия бо 6 гол беҳтарин бомбардор гардид. Ҷои сеюмро Фаронса ва ҷои чорумро Белгия ишғол карданд.

Чемпионати соли 1986 дар Мексика на танҳо пирӯзии Аргентина ва шӯҳрати Марадона, балки саргузашти ҳаяҷоновари футбол, иродаи халқи мексикагӣ ва як қатор бозиҳои фаромӯшнашаванда буд, ки онро ба яке аз беҳтарин мусобиқаҳои таърих табдил доданд.

“Рӯзгор”