БОЗДОШТИ ҲАМЛАГАРОН БА АТБОЪИ ЧИН

Дар шаҳри Душанбе як гурӯҳи табаҳкор боздошт шудааст. Пулис хабар додааст, ки дар Душанбе як гурӯҳи "табаҳкор"-ро боздошт кардааст. Ин гурӯҳ дар ғорати атбоъи Чин дар Тоҷикистон муттаҳам мешавад. Пулис мегӯяд, ин афрод ба шаҳрвандони чинӣ бо ҳадафи ғорат ҳамла карда ва бо истифода аз зӯр амволи онҳоро ба сирқат бурдаанд.

Ин парванда аз сӯи кормандони Идораи мубориза бо ҷароими созмонёфтаи вазорати корҳои дохилии ин кишвар таҳқиқи мешавад. Тибқи иттилоъи дафтари матбуъоти вазорати корҳои дохилӣ ё кишвари Тоҷикистон, дар ҷараёни бозрасӣ мушаххас шудааст, ки ду рӯзе қабл ин гурӯҳ ба манзури сирқату ғорат ба маҳалли зисти Ван Бин, табаъаи Чин дар шаҳраки Шарораи ноҳияи Ҳисор ҳамла кардааст. Маҳмадулло Асадуллоев, сухангӯи ин вазорат гуфт:

"Чун пуле дарёфт накарданд, ҳамлагарон оқои Вин ва хонумашро лату кӯб карда ва дар натиҷа хонум Вин ба бемористон мунтақил шудааст." Вай афзуд, ки дар моҳи сентябри соли ҷорӣ аъзои ин гурӯҳ ба манзили Лю Сяо Бин, шаҳрванди Чин ва мутахассиси корхонаи хишти ноҳияи Ҳисор ворид шуда ва бо истифода аз зӯр 750 дулори омрикоиро ба сирқат бурдаанд.

Ҳамчунин, ин гурӯҳи ба гуфтаи оқои Асадуллоев ҷиноӣ дар мавориди дигари ҳамла ва ғорати табаъаи дигари Чин дар шаҳри Душанбе низ мазнун будааст. Гуфта мешавад, ҳудуди як моҳ қабл ин афрод бо ниқоб ба ҳуҷраи Абдураҳмони Абдуғаффор, тоҷири чинӣ дар бозори “Душанбе-Шонгхой”-и пойтахти Тоҷикистон даромада ва бо таҳдиди корд аз ӯ 220 дулор, 120 сомонӣ ва телефони мобайли Nokiaро, ки 350 дулор арзиш доштааст, рабудаанд.

Зимнан, бино ба иттилоъи дафтари матбуъоти вазорати корҳои дохилии Тоҷикистон аъзои ин гурӯҳ қаблан барои иртикоби дуздӣ, фурӯши маводди мухаддир ва ҷароими дигар зиндонӣ шуда буданд. Гуфта мешавад, дар солҳои қаблӣ низ мавориди ҳамла ба атбоъи Чин ва ғорати пулу амволи онҳо сабт шуда буд.

Ин дар ҳолест, ки тайи чанд соли ахир теъдоди атбоъи чинӣ, ки дар Тоҷикистон кор ва зиндагӣ мекунанд, афзоиш ёфтааст.

Дар ҳамин ҳол, масъулони бахши муҳоҷирати кории Хадамоти муҳоҷирати Тоҷикистон аз додани иттилоъ дар бораи теъдоди умумии атбоъи Чин дар Тоҷикистон худдорӣ карда, вале таъкид доштанд, ки дар пайи густариши ҳамкориҳои иқтисодию тиҷоратӣ миёни ин ду кишвар дар солҳои ахир теъдоди шаҳрвандони чинӣ дар Тоҷикистон дар ҳоли афзоиш будааст.

Ба гуфтаи масъулони бозори “Корвон”-и шаҳри Душанбе, ҳоло дар ин бозор беш аз 50 нафар чинӣ фаъолият мекунанд. Қаблан дар бозори “Корвон” миёни тоҷирони чинию тоҷик даъвою мухолифате сурат гирифта буд, ки тоҷирони тоҷик ҳамтоёни чинии худро дар арзон фурӯхтани коло ва касод кардани бозори тоҷирони тоҷик муттаҳам карда буданд.