Расул Боқиев: Паҳлавонони боҳунару лаёқатманд зиёд дорем

Он шом толори варзишии "Тоҷ Пайтер"-и пойтахт фазои идонае дошт. Бо даъвати раҳбарияти Лигаи самбои муҳорибавӣ ва муҳорибаҳои омехтаи ҷумҳурӣ аз Маскав ба ин ҷо ҷаҳонпаҳлавони тоҷик, дорандаи медали биринҷии Бозиҳои олимпӣ дар шаҳри Пекин ва қаҳрамони чандин мусобиқаҳои байналмилалӣ дар гӯштини тарзи дзюдо Расул Боқиев барои гузаронидани машғулиятҳои намунавии тамринӣ (мастер-класс) ташриф овард.

Расул Боқиевро варзишгарони ҷавони тоҷик ва инчунин алоқамандони гӯштини тарзи дзюдо, ки ба ин толор омада буданд, бо кафкӯбиҳои бардавом пешвоз гирифтанд. Дар тани бархе аз варзишгарон футболкаҳоро бо акси Расул Боқиев дидан мумкин буд. Як тарафи толорро акси бузурги ӯ оро медод.

Аҳтам Хокиров, варзишгари номӣ, президенти Лигаи мазкур эълон дошт, ки ҷаҳонпаҳлавони тоҷик Расул Боқиев бо даъвати раҳбарияти ин созмони паҳлавонони тоҷик барои чанд рӯз аз Маскав ба Тоҷикистон омадааст, то бо варзишгарони наврас дар бархе аз ноҳияҳои кишвар машғулиятҳои намунавии тамринӣ баргузор намояд. Чунин тамринҳо то имрӯз дар ноҳияҳои Ҳисор ва Рӯдакӣ барпо гардиданд.

Сипас паҳлавонони навраси тоҷик, ки дар ин толори варзишӣ машқ мекунанд, дар назди Расул Боқиев ҳунари хешро ба намоиш гузоштанд. Бо хоҳиши варзишгарон Расул Боқиев барои хотира дар футболкаҳои онҳо соядаст гузошт. Расул Боқиев дар қувваозмоии тамринӣ бо паҳлавони ҷавон Солеҳ Ҳасанов чанд ҳиллаи тезтар мағлуб кардани ҳарифро, азҷумла он ҳиллаҳоеро, ки худ дар мусобиқаҳои байналмилалӣ истифода мебурд ва бар рақибонаш ғолиб меомад, барои паҳлавонони наврасе, ки дар толор ҳузур доштанд, нишон дод.

Дар поёни ин маҳфил Расул Боқиев бо хабарнигорони дохилӣ, ки дар ин мастер -класс ҳузур доштанд, як нишасти хабарии кутоҳе доир кард. Ӯ дар ин нишасти хабарӣ азҷумла иброз дошт, ки ҳанӯз ҳам дар Маскав дар клуби маъруфи "Самбо-70" таҳти раҳбарии мураббии шинохта Павел Владимиров машқҳои худро идома медиҳад.

Ӯ ният дорад, ки минбаъд чун ҳарвақта на дар вазни 73, балки дар вазни 81 килограмм қувваозмоӣ кунад. Тамоми машқу тамринҳояш ба он равона карда шудаанд, ки ҳарчи тезтару хубтар худро ба қувваозмоиҳо дар ин вазн мутобиқ созад. Охири моҳи июн дар Испания як мусобиқаи байналмилалӣ баргузор мегардад, ки ӯ нияти дар он худро дар ин категорияи вазн санҷидан дорад.

Агар дар ин сабқат ва мусобиқаҳои дигаре, ки баъдан ширкат хоҳад кард, бубинад, ки то андозае ба комёбиҳо даст меёбад, тамринҳояшро тибқи барномаи махсус барои пайдо кардани ҳаққи ширкат дар Бозиҳои Олимпии оянда идома хохад дод.

Расул Боқиев ба саволи хабарнигори ҳафтаномаи "Рӯзгор" дар хусуси он, ки мактаби падараш Худойназар Боқиев, ки дар он паҳлавонони наврас тарбия мегирифтанд, оё фаъол аст ё на, посух дод, ки мактаб фаъол аст ва дар он имрӯзҳо таҳти раҳбарии бародараш паҳлавони маъруф Рустам Боқиев наздик ба сад нафар паҳлавонони наврас тамрин мекунанд.

Ман агарчи ин шабу рӯзҳо бештар ба ислоҳи камбудиҳои худам машғул ҳастам ва аз вазъи гӯштини дзюдо дар Тоҷикистони азизамон чандон огаҳ нестам, вале боварӣ дорам, ки дар Ватани мо ҳамеша варзишгарони боҳунару лаёқатманд бешумор буданд ва дар оянда низ аз худ дарак хоҳанд дод, гуфт Расул Боқиев ба хабарнигорон.

Бознашр аз ҳафтаномаи «Рӯзгор» №21, 25 июни соли 2014