АРАБИСТОН БА ПИЗИШКОНИ ТОҶИК НИЁЗ ДОРАД

Намояндаи Палатаи тиҷорат ва саноати Арабистони Саудӣ Саъд Наҳҳор ал-Баддоҳ мегӯяд, кишвараш ба пизишкони тоҷик ниёз дорад.

Саъд Наҳҳор ал-Баддоҳ, раиси комиссиюни кордиҳандагони шӯрои палатаи тиҷорат ва саноати Арабистони Саудӣ, дар ин бора зимни мулоқот бо намояндагони хадамоти муҳоҷирати Вазорати умури дохилии Тоҷикистон дар шаҳри Душанбе эълон кардааст. Дар ин мулоқот, ки субҳи имрӯз, 3-юми ноябр, дар пойтахти кишвар шурӯъ шуд, намояндагони Вазорати тандурустии Тоҷикистон иброз кардаанд, ки барои фиристодани пизишкони ҳирфаии тоҷик ба Арабистони Саудӣ мусоидат хоҳанд кард.

Намояндаи Палатаи тиҷорат ва саноати Арабистони Саудӣ гуфтааст, ки барои табибони тоҷик дар кишвараш тамоми шароити кор ва зиндагӣ фароҳам карда хоҳад шуд. Ба гуфтаи ӯ, қабл аз вуруд ба Арабистони Саудӣ хоҳишмандон курсҳои омӯзиши забонҳои арабӣ ва инглисиро фаро хоҳанд гирифт, ки ин курсҳо дар Тоҷикистон ташкил хоҳанд шуд.