Фардо Муҳаммад Навоз Шариф ба Тоҷикистон меояд

Аз 17 то 18 июни соли 2014 сафари расмии Сарвазири Ҷумҳурии Исломии Покистон Муҳаммад Навоз Шариф баргузор мегардад.

Дар барномаи ин сафар мулоқоти Президенти ҶТ Эмомалӣ Раҳмон ва Сарвазири ҶИП Муҳаммад Навоз Шариф, вохурии ҳайатҳои васеи ду кишвар ва имзои як қатор санадҳои дуҷониба дар назар дошта шудааст.

Дар ин бора дар нишасти хабарие, ки бо ибтикори раёсати иттилооти ВКХ ҶТ барои хабарнигорони расонаҳои хабарӣ  имрӯз, 16 июн барпо шуд, иттилоъ доданд. Сардори Раёсат Абдулфайз Атоев аз ҷумла изҳор дошт, ки ҳамкориҳои сиёсӣ миёни ду кишвар бар мабнои принсипҳои якдигарфаҳмӣ, баробарӣ ва эҳтироми манфиатҳои миллии тарафайн ба роҳ монда шудаанд.

Айни замон пояи қарордодӣ-ҳуқуқии муносибатҳои дуҷонибаро қариб 40 адад созишномаю тафоҳумномаҳо ва дигар санадҳои байниҳукуматӣ ва байниидоравӣ, ки миёни ду кишвар ба имзо расидаанд, ташкил менамоянд.

Ҳамкориҳои иқтисодӣ-тиҷоратӣ ва сармоягузорӣ байни Ҷумҳурии Тоҷикистон ва Ҷумҳурии Исломии Покистон сол аз сол рушду тавсеъа ёфта, сатҳи сифатан навро касб кардаанд.

Табодули моли байни ду кишвар дар соли 2013 ба 84, 1 миллион доллари амрикоӣ расид, ки аз он содирот 19, 9 миллион доллари ИМА ва воридот 64,2 миллион доллари ИМА-ро ташкил медиҳад.

Дар доираи ин сафар Сарвазири ҶИП Муҳаммад Навоз Шариф бо Сарвазири ҶТ Қоҳир Расулзода мулоқот хоҳад кард.

Аҳмадшоҳи Султон, «Рӯзгор»