Аксҳо аз Фестивал - озмуни ҷумҳуриявии театрҳои касбӣ «Парасту 2017»
18 апрели соли 2017 дар театри давлатии академӣ-драмавии ба номи А. Лоҳутӣ Фестивал -озмуни ҷумҳуриявии театрҳои касбӣ «Парасту 2017» бахшида ба 100-солагии Артисти Халқии СССР Туҳфа Фозилова ва 20-умин солгарди Рӯзи Ваҳдати миллӣ бо намоиши спектакли «Пизишки паррон»-и Ж. Б. Молйер дар таҳияи Ҳунарманди мардумии Тоҷикистон, коргардони маъруф, Қурбон Собир баргузор гардид. Ибодуллоҳ Машрабов, Ҳунарманди мардумии Тоҷикистон, муовини вазири фарҳанги кишвар ба ин ҳамоиши театрҳои кишвар бо суханронии хеш ҳусни матлаъ бахшид. Фестивал-озмун то 24-уми апрел идома хоҳад кард. Дар «Парасту 2017» 17 намоишномаи театрҳои ҷумҳурӣ ба маърази тамошои алоқамандони театр ва ҳакамон гузошта мешавад. Чанд лаҳзаеро аз маросими ифтитоҳи ин чорабинии муҳими фарҳангии кишвар, дӯстони азиз, манзуратон мекунем.