Амалиёти ҳарбӣ алайҳи Толибон метавонад пас аз Иди Фитр оғоз шавад

Генерал Самӣ Содот омодагии худ ва омодагии шумори зиёди сарбозону сиёсатмадорони собиқи Афғонистонро ба амалиёти низомӣ алайҳи Толибон эълон кард.

Дар мусоҳиба бо Би-би-сӣ ӯ гуфт, ки ҳукмронии ҳаштмоҳаи Толибон бисёре аз афғонҳоро мутмаин сохт, ки амалиёти низомӣ ягона роҳи мубориза бо онҳост.

Генерал Содот, ки дар арафаи суқути ҳукумати Афғонистон фармондеҳии нерӯҳои вижаи Афғонистонро ба ӯҳда гирифт, гуфт, ки ният дорад ба Афғонистон баргардад ва амалиёти зидди Толибон пас аз иди Фитр метавонад оғоз шавад.

Ёдовар мешавем, ки Толибон моҳи августи соли 2021 пас аз шикасти нерӯҳои амниятии ҳукумати пешин Афғонистонро таҳти назорат гирифтанд. Ҳамзамон эътилофи байнулмилалӣ таҳти раҳбарии Амрико ба ҷанги 20-солаи худ дар ин кишвар расман хотима дод.

Генерал Содот дар бораи нақшаҳои худ ба Би-би-сӣ гуфт, ки ӯ ва дигарон барои наҷоти Афғонистон аз дасти Толибон ва барқарор кардани демократия дар ин кишвар ҳама кори имконпазирро мекунанд.

«Мо то даме, ки озодии худро барқарор накунем, муборизаро давом медиҳем», — гуфт ӯ.

"Он чи мо дар давоми ҳашт моҳи ҳукмронии Толибон дар Афғонистон мушоҳида кардем, ҷуз маҳдудиятҳои мазҳабӣ, тафсири нодурусти Қуръони карим ба ҳадафҳои сиёсии ин гурӯҳ, чизе беш нест", гуфт як низомии собиқи афғон бо назардошти қонунҳои сахти Толибон аз ҷумла маҳдудиятҳои шадид барои занону духтарон.

Вай афзуд, ки дар ибтидо қасд дошт ба Толибон 12 моҳ муҳлат диҳад, то бубинад, ки ин гурӯҳ рафтори худро тағйир медиҳад ё на.

"Мутаассифона, мо ҳамарӯза дар бораи Толибон масалан, дар бораи шиканҷаи одамон, куштор, нопадидшавӣ, нарасидани маводи ғизоӣ, камғизоии кӯдакон чизи наве меомӯзем", - гуфт генерали собиқ.

Содот гуфт, ки вай ҳар рӯз аз афғонҳо садҳо мактуб мегирад, ки аз ӯ мепурсанд, ки нақшаҳои ӯ чист.

Гурӯҳҳои сершумор барои сарнагун кардани Толибон муттаҳид шудаанд, аммо онҳо ба гурӯҳҳои мухталифи этникӣ тааллуқ доранд ва ба фармондеҳони рақиб итоат мекунанд. Генерал Содот мегӯяд, ки ин гурӯҳҳо бо Фронти миллии муқовимат бо сарварии Аҳмад Масъуд робита доранд.

"Ман бо бародари Аҳмад Масъуд дар тамос ҳастам ва аз иқдомоти ӯ комилан ҷонибдорӣ мекунам", - афзуд ӯ.

Генерал гуфт, ки дигар гурӯҳҳои муқовиматро низ дар тамос ва дастгирӣ мекунад.

Regnum