МАҲФИЛИ ШЕЪРУ СУРУДИ ҲАҚНАЗАР ҒОИБ

Имрӯз, 15-уми декабр, дар толори маҷлисҳои бинои марказии Донишгоҳи Миллии Тоҷикистон маҳфили шеъру суруди Шоири Халқии Тоҷикистон Ҳақназар Ғоиб баргузор гардид. Маҳфилро бо сухани муқаддимавӣ ректори Донишгоҳ Нуриддин Саидов кушод.

Сипас Ҳақназар Ғоиб шеърҳои ба тозагӣ эҷод намудаашро ба аҳли толор, ки асосан аз донишҷӯён иборат буданд, қироат кард. Дар маҳфили шеъру суруди Ҳақназар Ғоиб Шоирони халқии Тоҷикистон Гулназар Келдӣ, Сайидалӣ Маъмур дар бораи соҳибҷашн  ва эҷодиёти ӯ ибрози нуқтаи назар намуда ашъори ба ӯ бахшидаашонро пешкаши аҳли толор карданд. Дар ин маърака Ҷӯрабек Муродов, Артисти Халқии Иттиҳоди Шӯравӣ, Қурбоналӣ Раҳмон, Ҳунарманди Мардумии Тоҷикистон бо ансамбли «Сомон», Хосияти Зарафшонӣ, Ҳунарманди Мардумии Тоҷикистон суруду таронаҳои бар ашъори Ҳақназар Ғоиб эҷод намудаи худро суруданд.

Дар хотима Ҳақназар Ғоиб ба суолҳои донишҷӯён посух дода ба хоҳишмандон соядаст тақдим намуд ва аксҳои хотиравӣ гирифт.

Хушбахти Нарзуллоҳ, донишҷӯи факултети журналистикаи ДМТ

Адреси доимии маводи мазкур: http://www.ruzgor.tj/adabiyot-va-farhang/3881-2010-12-15-11-16-19.html