ҶАМЪБАСТИ НАТОИҶИ НАЗАРСАНҶИИ НАВБАТИИ СОМОНАИ «РӮЗГОР»
Сомонаи мустақили ҷамъиятиву сиёсии «Рӯзгор» 24-уми декабри соли 2010 Лоиҳаи «Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд»-ро ба нашр расонда дар мавзӯи «Қабули Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» аз 1-уми январи соли ҷорӣ то 12-уми апрел назарпурсӣ доир кард, ки тӯли ин муддат 268 нафар муштарии сомона доир ба шаш намуд ҷавоби эҳтимолӣ оиди ин мавзӯъ ҷонибдор ва ё мухолиф будани худро бо ин натиҷаҳо изҳор доштаанд:
Тарафдори посухи «ҷомеа ба он эҳтиёҷ надорад» аз ҳама бештар 74 нафар будаанд, ки ин 27.6%-ро аз шумораи умумии назардодагон ташкил медиҳад.
Посухи «ба афзоиши ришвахорӣ мусоидат мекунад»-ро 56 нафар тарафдорӣ кардаанд, ки ин 20.9%-и иштирокчиён дар ин назрсанҷиро ташкил медиҳад.
Чилу шаш нафар ё худ 17.2% аз ибрози назаркардагон посухи «дар будан ва набуданаш зарар ва ё фоидаро намебинам»-ро интихоб кардаанд.
Чилу як нафар ё худ 15.3%-и ширкаткунандаи ин назарсанҷи назар додаанд, ки Қонун «саривақтӣ ва талаби замон аст».
Сиву як нафар ё ин ки 11.6% -и посухдодагон мӯътақиданд, ки Қонун «сатҳи тарбияи насли наврасро болотар мебардорад».
Бист нафар ё ин ки 7.5% овоздодагон бар ин назаранд, ки ин Қонун «масъулияти мактабу маорифро дар тарбия коҳиш медиҳад».
Дар тӯли қариб панҷ моҳи баъди ба нашр расидани Лоиҳаи «Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» дар сомонаи мо доир ба ин мавзӯъ хабару мақола ва фикру андешаҳои гуногунмазмуни зиёде дарҷ гардидаанд, ки дар сурати майл доштани муштарӣ ин маводҳо барояш аз гӯшаи «Ҷустуҷӯ»-и сомона қобили дарёфтанд.
«Рӯзгор»
