ПИРӮЗИИ НАХУСТИН ДАР МУСОБИҚОТИ ҶОМИ ФФО

Дар мусобиқоти Ҷоми муборизони Федеротсиюни Футболи Осиё тими мунтахаби Тоҷикистон бар тими Қирғизистон бо ҳисоби як бар сифр пирӯз шуд. Бино ба иттилоъи сойти интернетии Федеротсиюни Футболи Осиё (www.the-afc.com) тӯби ягонаро Руслан Содиқов, футболбози қирғиз дар дақиқаи 88-ум ба дарвозаи худ задааст.

Ин манбаъ мегӯяд, Пӯлод Қодиров, мураббии тими мунтахаби Тоҷикистон аз ҳунарнамоии футболбозони тоҷик ибрози норизоиятӣ карда ва гуфтааст, ки тими Тоҷикистон дар тӯли бозӣ лаҳзаҳои маъдуди голзанӣ доштаанд. Бозиҳои дигари тими мунтахаби Тоҷикистон рӯзи 23 март бо тими Кумбуҷӣ ва рӯзи 25 марти соли ҷорӣ бо тими мунтахаби Ҷазоири Молдив баргузор хоҳад шуд.

Дар бозиии дигари гурӯҳи “С” дастаи мунтахаби Ҷазоири Молдив бар дастаи мунтахаби Кумбуҷӣ бо ҳисоби калони 4 бар сифр дастболо шудааст. Дар мусобиқоти Ҷоми муборизони Федеротсиюни Футболи Осиё, ки рӯзи душанбеи 21 март дар Ҷазоири Молдив шурӯъ шуд, 20 тими мунтахаби кишварҳои қораи Осиё ширкат мекунанд.

Аз миёни кишварҳои Осиёи Марказӣ тимҳои мунтахаби Тоҷикистон, Қирғизистон ва Туркманистон барои пирӯзӣ дар ин мусобиқоти байналмилалӣ талош хоҳанд кард. Тими Туркманистон дар бозии аввали худ дар гурӯҳи “В” бар тими мунтахаби Покистон бо ҳисоби 3 бар сифр пирӯз гардид.

Зимнан, тими мунтахаби Тоҷикистон дар мусобиқоти Ҷоми муборизони Федеротсиюни Футболи Осиё шаҳри Коломбо, пойтахти Сри-Лонко дар моҳи феврали соли гузашта медоли биринҷӣ ё брунзро ба даст оварда буд. Дар бозии ниҳоӣ тими Куриёи Шимолӣ бар тими Туркманистон пирӯз гардида ва соҳиби медоли тиллои мусобиқот шуда буд.

Би-Би-Си