Ҳифзи марзу буми сарзамин рисолати мардонагист
«Артиш сипари мамлакат, кафили амният ва зиндагии осоиштаи мардум маҳсуб мешавад».
Эмомалӣ Раҳмон
«Артиши миллӣ дар радифи дигар ниҳодҳои давлатдорӣ ва сохтору мақомоти қудратӣ яке аз самараҳои истиқлолият буда, дар ташаккули низоми мудофиавии кишвар нақши муҳим дорад». Ин матлаб зимни баргузории ҷамъомад, ки ба ифтихори Рӯзи Артиши миллӣ дар Донишкадаи идоракунии давлатии назди Президенти Ҷумҳурии Тоҷикистон доир гардид, зикр шуд.
Лутфия Абдулхолиқзода- ректори Донишкадаи идоракунии давлатии назди Президенти кишвар аҳли нишаст ва кулли мардуми кишварро бо ин санаи таърихии кишварамон табрик намуда, ба онҳо дар ҳимояи марзу буми кишвар, таъмини амнияту оромии давлати соҳибистиқлоли Тоҷикистон матонату шуҷоат таманно намуд.
Зикр шуд, ки дар марҳилаи торафт вусъат пайдо кардани бархӯрди қудратҳои ҷаҳонӣҳимояи манфиатҳои милливу давлатӣ, ҳифзи суботу оромии ҷомеа, таҳкими ваҳдати миллӣ ва дар ин замина фароҳам овардани шароити мусоид барои беҳтар гардонидани сатҳу сифати зиндагии мардум вазифаи аввалиндараҷаи тамоми рукнҳои ҳокимияти давлатӣ, аз ҷумла ҳайати шахсии Қувваҳои Мусаллаҳ мебошад.
Инчунин дар ҷамъомад муовини аввали директори Агентии хизмати давлатӣ Гурез Қосимзода аз таваҷҷуҳи доимии давлату Ҳукумати Тоҷикистон ба Артиши миллӣ ибрози назар намуда, зикр сохт, ки шуҷоату мардонагии аскарону афсарони Қувваҳои Мусаллаҳи кишвар идомаи корнамоиву фидокории ҳазорон родмардони сарзамини аҷдодиамон аст, зеро хизмат ба Ватан ва ҳифзи марзу буми он рисолати мардонагист.
АМИТ «Ховар»
