ҚОТИЛИ МУҲОҶИРИ ТОҶИК ЗИНДОНӢ ШУД

Додгоҳе дар шаҳри Тюмени Русия як шаҳрванди Озарбойҷонро дар қатли се нафар муқассир донист ва ин фардро барои 18 сол равонаи зиндон кардааст. Рӯзи душанбеи 13-уми декабр, додгоҳи вилоятии шаҳри Тюмен дар охирин рӯзи мукокимаи Зулфиқор Мамедови 27 сола, эълом кард, ки оқои Мамедов дар қатли ду сокини Озарбойҷон ва як муҳоҷири корӣ аз Тоҷикистон гунаҳкор дониста шудааст.

Бар асоси иттилоъи додгоҳ оқои Мамедов, субҳи 21-уми сентябр аз шаҳри Перми Русия ба шаҳри Тюмен барои кумак ба корҳои дӯсташ, Элхон Мамедов омада буд. Дар ин рӯз вай ҳамроҳ бо Элхон Мамедов ба қаламрави таъссисоти тиҷоратии мавсум ба «Сибирская на Барабинской», макони фаъолияти Қаҳрамоновҳо, як хонаводаи озарӣ омад ва ба сӯйи аъзои хонавода гулӯла шилик кард. Дар натиҷа бародарон Ҷассорат ва Сабуҳа Қаҳрамоновҳо шадидан захмӣ шуда ва ҷони худро аз даст доданд. Ромил Қаҳрамонов яке дигар аз бародарон дар ин тирпарронӣ ҷароҳат бардошт.

Вале як шаҳрванди 24 солаи тоҷик низ, ки номи ӯ эълом нашудааст дар ин ҳодиса ҷон медиҳад. Гуфта мешавад, ки ин муҳоҷири тоҷик дар муассисаи тиҷоратӣ ба ҳайси борбар кор мекардааст. Тибқи парванаи ҷиноӣ Элхон ва Зулфиқор Мамедовҳо, баъд аз анҷоми ин куштор кӯшиши фирор аз макони ҳодиса карда, вале бо кумаки яке аз нигаҳбонони таъссисоти тиҷорӣ пулис онҳоро боздошт кардааст.

Бар асосии иттилоъи пулиси Русия Элхон Мамедов, яке дигар аз муттаҳамони ин парванда дар ҷараёни расидагӣ ба он фавтидааст ва баррасии ширкати вай дар ин ҳодиса қатъ карда шуд. Вале Зулфиқор Мамедов бар асоси моддаи 222 Қонуни кайфарии Русия, яъне ҳамли ғайриқонунии аслиҳа ва куштори се нафар, гунаҳкор дониста шуд ва ба 18 сол зиндони низомаш сангин маҳкум шуд.

Дар ҳамин ҳол, дар соли 2010, нозирони ҳуқуқи башар дар Русия аз коҳиши мавориди ҳамлаи ба атбоъи хориҷӣ аз ҷумла ба муҳоҷирони корӣ аз Тоҷикистон дар қаламрави Русия гузориш медиҳанд.

Би-Би-Си

Адреси доимии маводи мазкур: http://www.ruzgor.tj/news/28-latestnews/3854-2010-12-13-17-11-23.html