АФЗОИШИ ШУМОРИ НАШЪАМАНДОН ДАР ХАТЛОН

Маркази мӯътодон ба маводди мухаддир дар вилояти Хатлон аз афзоиши теъдоди нашъамандон ё афроди мӯътод ба ин мавод дар вилоят изҳори нигаронӣ кардааст.

Хуршед Назаров, мутахассиси ин марказ дар шаҳри Қурғонтеппа, ба Би-би-сӣ гуфт афзоиши наъшамандон тайи чанд моҳи ахир ба мушоҳида расида ва шумори онҳо ба 1186 нафар расидааст. Ба гуфтаи вай, бештари нашъамандон аз 18 то 29-сола буда, қисмати зиёди онҳо мӯътодони афюнӣ будаанд. Баъзе аз онҳо боре табобат шуда ва дубора ба маводди мухаддир мӯътод шудаанд.

Ба гуфтаи оқои Назаров, дар ҳоле, ки шумори мӯътодон ба маводди мухаддир дар вилояти Хатлон рӯ ба афзоиш аст, нарасидани пизишкони нарколог ё эътиёдшинос дар вилоят эҳсос мешавад. Ҳамакнун, дар ду маркази мӯътодон ба маводди мухаддир дар шаҳрҳои Кӯлобу Қурғонтеппа табибоне фаъолият мекунанд, ки дар заминаи эътиёд ба ин мавод тахассус надоранд. Вале онҳо барои пешгирӣ ва табобати мӯътодон ва майзадаҳо хидмат мекунанд.

Би-Би-Си