БОЗДОШТИ СЕ НАФАР БА ЗАННИ КӮДАКФУРӮШӢ

Маъмурони пулиси Тоҷикистон дар шаҳри Душанбе чанд нафарро ба иттиҳоми даст доштан дар муъомилае барои кӯдакфурӯшӣ боздошт кардаанд. Хабаргузории маҳаллии "ASIA-Plus" аз қавли манобеъи вазорати умури дохилаи Тоҷикистон овардааст, ки ахиран маъмурони пулис як зани сокини рустои Чортути ноҳияи Рӯдакиро боздошт кардаанд.

Ба гуфтаи ин манбаъ, ин зан ба унвони миёнҷӣ бо як сокини Исфара муъомила карда ва мехост кӯдаки чаҳорсолаи ӯро бо маблағи 25 ҳазор дулор ба як тоҷири 32-сола аз ноҳияи Рӯдакӣ бифурӯшад. Номи ин афрод ифшо нашуда, вале мақомот мегӯянд, ки модари кӯдак аз ноҳияи Исфара, ки 27 сол дошта, зане бекор ва фақир будааст. Аммо зани сокини ноҳияи Рӯдакӣ, ки 47 сол дошта ва ба унвони миёнҷӣ амал мекард, қаблан як бор зиндонӣ шудааст.

Маъмурони интизомӣ ҳамаи ин афродро боздошт кардаанд ва таҳқиқот дар ин замина идома дорад. Ба гуфтаи манобеъи Вазорати умури дохилаи Тоҷикистон, дар соли 2010 кормандони пулис беш аз 530 ҷинояти марбут ба қочоқи инсон ё одамфурӯширо кашф ва омилони онҳоро боздошт кардаанд, ки аз ин миён 16 маврид ба хариду фурӯши кӯдакони ноболиғ марбут аст.

Би-Би-Си