«ИСТИҚЛОЛ» МАРОТИБАИ ДУВВУМ СОҲИБИ СУПЕРКУБОК ШУД

Чанд лаҳза пештар дар варзишгоҳи марказии шаҳри Қӯрғонтеппа маркази вилояти Хатлон бозии футбол байни дастаҳои «Истиқлол» ва «Регар ТАДАЗ» барои гирифтани Ҷоми Ҷомҳо ё худ Суперкубок ба анҷом расид. 

Дар тӯли навад дақиқаи бозӣ ба ҳеҷ кадом аз тарафҳо муяссар нашуд, ки ба дарвозаи ҳариф тӯб бизанад. Доварон барои муайян карани ғолиб 30 дақиқа вақти иловагӣ доданд. Дар дақиқаи 17-уми вақти иловагӣ ба ҳуҷумкунандаи дастаи «Истиқлол» Дилшод Васиев муяссар шуд, ки тӯбро вориди дарвозаи «Регар-ТАДАЗ» намояд.

Талошу кӯшишҳои бозингарони «Регар-ТАДАЗ» барои баробар кардани ҳисоб натиҷаи дилхоҳ надоданд. Ҳамин тариқ бозӣ бо ҳисоби як  бар сифр ба фоидаи тими «Истиқлол» анҷом ёфт. «Истиқлол» инак маротибаи дуввум аст, ки соҳиби Суперкубоки Тоҷикистон оид ба футбол мегардад.

Субҳон Озодаев, «Рӯзгор» аз Қӯрғонтеппа