Мулоқоти Эмомалӣ Раҳмон бо Подшоҳи Урдун дар Остона: Аз амнияти зеҳни сунъӣ то авзои Ховари Миёна

Имрӯз, 6 ноябр, Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Остонаи Ҷумҳурии Қазоқистон бо Подшоҳи Шоҳигарии Ҳошимии Урдун Абдуллоҳи II ибни Ал-Ҳусайн вохӯрӣ анҷом дод. Ин мулоқот дар ҳошияи ҷаласаи «Раванди Ақаба», ки ин дафъа ба мавзуи «Амният дар соҳаи зеҳни сунъӣ» бахшида шудааст, сурат гирифт.

Дар оғози суҳбат Сарвари давлати Тоҷикистон бо таъкиди ҷойгоҳи махсуси ин кишвари арабӣ изҳор дошт: «Мо кишвари Шуморо аз шарикони муҳими худ дар минтақаи Ховари Миёна ва ҷаҳони ислом медонем».

Дар ҷараёни гуфтугӯҳо ҷонибҳо масъалаҳои муҳими зеринро баррасӣ карданд:

- Таваҷҷуҳи асосӣ ба густариши ҳамкориҳои сиёсӣ, иқтисодию тиҷоратӣ ва фарҳангию башарӣ зоҳир шуд. Таъкид гардид, ки барои ин кор фаъол намудани комиссияи байниҳукуматӣ, машваратҳои сиёсӣ ва робитаҳои байнипарлумонӣ зарур аст.

- Роҳбарони ду кишвар атрофи ташаббуси Урдун — “Раванди Ақаба” ва ҳамкории муштарак ҷиҳати истифодаи босамар ва бехатар аз зеҳни сунъӣ ва технологияҳои рақамӣ мубодилаи афкор намуданд.

- Авзои кунунии Ховари Миёна ва роҳҳои ҳалли сиёсию дипломатии низоъҳо дар ин минтақаи ҳассоси ҷаҳон мавриди таваҷҷуҳи ҷиддии тарафҳо қарор гирифт.

Дар хотимаи мулоқот Президенти Тоҷикистон Эмомалӣ Раҳмон аз Подшоҳи Урдун Абдуллоҳи II даъват ба амал овард, ки дар вақти барояшон муносиб бо як сафари расмӣ аз Тоҷикистон боздид намояд.

“Рӯзгор”