СУХАНШИНОСЕ, КИ ҚАДРИ СУХАНВАРОН МЕДОНАД
Дар маҷлисгоҳи Иттифоқи нависандагони Тоҷикистон маҳфили рӯнамоии чор китоби таҳия, мураттаб ва ба нашр расондаи Муҳаммадиқболи Садриддин, олим ва муҳаққиқи ҷавон, сарпарасти Бунёди ҷамъиятии «Васатият» «Суханварони Балх», «Суханварони Ҳирот», Суханварони Ғазнин» ва «Паёми Иқбол» баргузор гардид.
Маҳфилро бо сухани муқаддимавӣ Камол Насрулло, муовини раиси Иттифоқи нависандагон, Шоири Халқии Тоҷикистон ифтитоҳ намуд. Сипас маҳфилро Нурмуҳаммади Амиршоҳӣ, олими маъруфи таърихшиноси тоҷик раисӣ кард. Ӯ дар суханронии худ кори ба анҷом расондаи пажӯҳишгари ҷавонро хизмати бузурге барои миллат арзёбӣ намуда, азҷумла гуфт, ки ин муҳаққиқи ҷавон кореро анҷом додаст, ки «пажӯҳишгоҳи забон ва адабиёт анҷом надодааст».
Дар ин маҳфил Абдулғафури Орзу-сафири кабири Ҷумҳурии Исломии Афғонистон дар Тоҷикистон, Муҳаммад Алӣ-консули сафорати Ҷумҳурии Исломии Покистон дар Тоҷикистон, Абдуғаффори Абдуҷаббор- раиси дастгоҳи иҷроияи вазорати фарҳанги Тоҷикистон, Саидмукаррами Абдуқодирзода- раиси Маркази Исломии Тоҷикистон, Мирзо Шукурзода- нависанда ва муҳаққиқ, Файзулло Бобоев- муовини директори институти забон, адабиёт, шарқшиносӣ ва мероси хаттии АИ ҶТ ба номи устод Рӯдакӣ, Шаҳрия-шоираи маъруфи кишвар суханронӣ намуда дар бораи заҳматҳои кашидаи таҳиягар ва мураттиби китобҳои мазкур ҳарфҳои ҷолибу муносиб заданд.
Воқеан, Муҳаммадиқболи Садриддин, ки ҳамагӣ 34 сол дорад, дар як муддати кӯтоҳи фаъолияти хеш корҳои зиёд ва муфидеро анҷом додаст. Феҳристи китобҳои таълиф, тарҷума, таҳия ва баргардонкардаи муаллиф дар ҳоли ҳозир аз 42 номгӯйи асарҳое иборат аст, ки барои уламо ва аҳли зиё хеле муфиданд. Китобҳои «Саду як қисса аз ҳаёти Муҳаммад (с)». «Тафсири мухтасари Хатлонӣ» дар се ҷилд, «Даҳ ёри биҳиштӣ», «Сирати Расули Акрам (с)» дар ду ҷилд ва ғайра китобҳои рӯйимизии алоқамандон ва дӯстдорони китоб ба шумор мераванд.
Боварӣ ҳаст, ки китобҳои дар боло зикршуда ҳам мақбули хонандагони сершумор хоҳанд шуд. Бояд гуфт, ки китобҳои «Суханварони Балх», «Суханварони Ҳирот», Суханварони Ғазнин» ва «Паёми Иқбол» зери назари Файзулло Аҳё таҳия ва мураттаб гардидаанд. Муҳаррири масъули китобҳо донишманд ва пажӯҳандаи шинохтаи тоҷик Қиёмиддин Сатторӣ буда барои ҳар яке аз ин китобҳои аз ҷиҳати ороиш зебо ва за ҷиҳати маънӣ воло сарсуханҳои пурмӯҳтаво ва муфиде навиштааст.
Дар хотимаи маҳфил Муҳаммадиқболи Садриддин изҳор дошт, ки дар оянда низ ин иқдоми некро идома хоҳад дод. Ӯ талош дорад, ки то ҷашни Наврӯз китобҳои «Суханварони Самарқанд» ва «Суханварони Бухоро»-ро таҳия ва ба нашр бирасонад. Дар нақшаи кори ӯ дар ояндаи наздик таҳия ва ба дасти чоп расондани китобҳои «Суханварони Хоразм», «Суханварони Хева», «Суханварони Дарвоз», «Суханварони Қаротегин» ва «Суханварони Ҳисор мавқеи аввалро ишғол мекунад.
«Рӯзгор»
Шарҳҳо
Ту ахли донишу фазли хамин гунохат бас!
Бародари гироми Мухаммадикбол муборак бошад боз як нашри китобхои чадиди шумо ,ки барои хар як фарди точик фикр мекунам чун обу хаво лозим хастанд.Худован д ачри мехнатхои шуморро аз хазинаи адонашавандаш сарфароз гардонад.Мувафф аку сарбаланд бошед! Худованд ёру мададгори шумо бошад!
RSS Обуна