«ПАЁМИ МАШРИҚ»-И ИҚБОЛРО ҚУРБОНАЛӢ РАҲМОН БА БАДАХШОН БУРД

Дирӯз 22.07.2012, дар қасри фарҳанги маркази ноҳияи Роштқалъаи Вилояти Мухтори Кӯҳистони Бадахшон консерти Муассисаи давлатии ансамбли «Сомон»-и Вазорати Фарҳанги Ҷумҳурии Тоҷикистон баргузор гардид. Ин гурӯҳи машҳури ҳунарӣ чун анъана дар фасли тобистон ҳар сол як сафари ҳунарие ба Бадахшон доир мекунад.

«Дар гастроли имсолаи худ мо ба тамошобинони серталаби Бадахшон барномаи консертии «Паёми Машриқи Аллома Иқбол»-ро, ки чанде пештар онро манзури алоқамандони шеъру мусиқӣ дар пойтахти кишвар карда будем, пешкаш намудем»,- гуфт дар як тамоси телефонӣ ба хабарнигри сомонаи «Рӯзгор» раҳбари бадеии ин ансамбл, Ҳунарманди Мардумии Тоҷикистон Қурбоналӣ Раҳмонов.

«Гастроли мо рӯзи 16-уми июл аз ноҳияи Қалъаи Хумб оғоз шуда, тӯли ин рӯзҳо мо боз ба заҳматкашони ноҳияҳои Ванҷу Рӯшон ва инчунин Шуғнон барномаҳои консертӣ намоиш додем»-, гуфт дар идомаи сӯҳбаташ Қурбоналӣ Раҳмон.

Ба гуфтаи нафароне, ки дар ин консертҳо ҳузур доштанд, алоқамандони ҳунари мусиқии ноб ҳунарнамоии Қурбоналӣ Раҳмон, Азизмурод Бобиев, Гулҷаҳон Иброҳимова, Меҳриниссо Шарифова ва ромишгарони мумтоз Артисти Хизматнмишондодаи Тоҷикистон Аҳмадҷон Орифов, Арбоби Шоистаи Тоҷикистон Намозалӣ Раҳмонов, раҳбари мусиқии даста Ҷамолиддин Наҷмиддиновро гарму ҷӯшон истиқбол карданд.

Сафари ҳунарии ансамбли «Сомон» ба Бадахшон боз як ҳафтаи дигар идома хоҳад дошт.

Дар баробари он ки шумо, муштариёни гиромии сомона, дар боло як суруди тоза ба навори видеоӣ гирифтаи ансамблро аз барномаи «Паёми Машриқ»тамошо кардед, бо ангушт задан ба ин ҷумла шумо метавонед аксҳоеро аз ин барномаи консертӣ, ки дар Душанбе доир шуданд, тамошо кунед.

«Рӯзгор»