ГАЗИ МОЕЪ ҶОИ БЕНЗИНРО МЕГИРАД
Масъулини Вазорати рушди иқтисод ва савдои кишвар мегӯянд, афзоши воридоти гази моеъ талаботи Тоҷикистонро ба дигар намуди сӯзишворӣ кам кардааст.
Тавре аз вазорати мазкур иттилоъ доданд, ҳоло талабот ба бензин мисли пештара набуда, ҷой онро гази моеъ гирифтааст. Бино ба иттилои манбаъ, имсол ба Тоҷикистон аз кишварҳои хориҷа дар ҳаҷми 68,4 ҳазор тонна гази моеъ ворид шудааст, ки ин нишондод нисбат ба ҳамин давраи соли гузашта 4 баробар зиёд мебошад: «Дар нимсолаи аввали соли гузашта ба кишвар ҳамаги 14 ҳазор тонна гази моеъ ворид шуда буд. Яъне имсол ҳудуди 54 ҳазор тонна зиёд ворид шудааст».
Гази моеъ, ки истифодааш дар Тоҷикистон давоми ду соли ахир босуръат зиёд шудааст, аз рӯи маълумоти Вазорати энергетика ва саноат, айни ҳол дар бозорҳои кишвар нархаш арзон шудааст. Манбаъ мегӯяд, феълан дар Тоҷикистон як литр гази моеъ 2 сомону 50 дирам, 2 сомону 60 дирамро ташкил медиҳад, ки ин нишондод нисбат ба ҳамин давраи соли 2011-ум 50% арзон шудааст.
Темур Раҷабализода, «Рӯзгор»