РАИСОНИ НАВОҲИИ СУҒД БАРКАНОР ШУДАНД

Раисиҷумҳури Тоҷикистон бо судури як фармон раисони як қатор шаҳру навоҳии вилояти Суғдро аз вазифа барканор кард. Ҳамчунин бо қарори ҳукумати кишвар дар бархе аз вазоратхонаҳо низ тағйироти кадрӣ сурат гирифтааст. Бо фармони раисиҷумҳур, Муҳиба Ёқубова аз вазифаи раиси шаҳри Исфараи вилояти Суғд озод карда шуд ва Субҳониддин Ашӯров иҷрокунандаи вазифаи раиси ин шаҳр таъин гардид.

Дар асоси ин фармон, ҳамчунин раиси шаҳри Конибодом Ҳилолиддин Шамсиддинов ва раиси ноҳияи Спитамен Аҳмадҷон Қобилов барканор ва Нумон Обидов ва Зулфия Узоқова ҷойгузини онҳо шуданд. Бо қарори ҳукумати Тоҷикистон, ахиран Субҳониддин Ашуров, муовини вазири меҳнат ва ҳифзи иҷтимоии аҳолӣ бо сабаби ба кори дигар гузаштанаш аз ин симат озод гардид.

Ҳамчунин Амонҷон Эшонқулов, муовини аввал ва Анвар Наҷмиддинов, муовини раиси Кумитаи давлатии сармоягузорӣ ва идораи амволи давлатӣ таъин шудаанд.

«Озодӣ»

Адреси доимии маводи мазкур: http://www.ruzgor.tj/siyosat/2002-2010-03-26-16-38-08.html