Ҷӯрахон Обидпур ва Фирӯз Ӯлмасов соҳиби ҷоизаи Иттифоқи композиторон шуданд

Ахиран Иттифоқи композиторони Тоҷикистон барандагони Ҷоизаи ба номи Борбадро дар соҳаи  мусиқӣ эълон кард. Раиси Иттифоқи композиторони Тоҷикистон Хуршед Низом дар расми тантанавии эътои ҷоиза иброз дошт, ки озмуни мазкур моҳи июн эълон гардида буд.

Тибқи хулосаи аъзои ҳакамони озмун ва Қарори раёсати Иттифоқи композиторони Тоҷикистон бо ҷоизаи мазкур Арбоби ҳунари Тоҷикистон, профессор Ҷурахон Обидпур ва мусиқишинос, доктори илмҳои санъатшиносӣ Фирӯз Ӯлмасов сарфароз гардонида шуданд.

Маврид ба зикр аст, ки Ҷоизаи Иттифоқи композиторони Тоҷикистон ба номи Борбад дар соҳаи мусиқӣ соли 2004 тибқи Фармони Президенти Ҷумҳурии Тоҷикистон «Дар бораи ҷоизаҳои Иттифоқи нависандагони Тоҷикистон ва Иттифоқи композиторони Тоҷикистон» бо мақсади рушди минбаъдаи санъати мусиқӣ ва ҳавасмандгардонии композиторону мусиқишиносон дар роҳи офаридани асарҳои баландғояи муосир ва инъикоси арзишҳои миллӣ таъсис ёфтааст.

Тибқи оиннома ҷоизаи мазкур ба бастакорон ва мусиқишиносоне дода мешавад, ки дар ду соли охир беҳтарин асарҳои академӣ, симфонӣ, камеравӣ эҷод намуда, дар масъалаҳои пажӯҳиши таърихию назариявии санъати миллӣ ва такомули методологии санъати касбии миллӣ асар офаридаанд.

«Рӯзгор»