ДАР МАҲФИЛИ БОРБАДИ СОНӢ - АКАШАРИФ ҶӮРАЕВ

16-уми июни соли 2010 дар Кохи Ҷомӣ ба хотири гиромидошти устод Акашариф Ҷӯраев консерти ансамбли давлатии «Шашмақом»-и Кумитаи радио ва телевизиони Тоҷикистон баргузор гардид. Дар аввал роҳбари бадеии ансамбл Фурқат Саидов тамошобинонро бо роҳи тайнамудаи бо ифодаи устод Айнӣ ин Борбади сонии тоҷик мухтасаран ошно намуд.

Сипас дар консерт овозхонҳои хушсадои ин ансамбли овозадор бархе аз таронаҳои ҷовидонаи ин сардафтари ҳунари мусиқии муосири тоҷикро ба алоқамандони мусиқии ноб тақдим намуданд. Хусусан суруду таронаҳои «Қалъабандӣ», «Субҳи кишвари рӯят», «Чорзарб» дар иҷрои коллектив, сурудҳои «Ёр гул сумане», «Ҷоно ман аз фироқат», «Аллат мегум бачаме», «Нозанине ман бидидам», «Қиблаи ҷон», «Ироқи Дарвоз», «Маҳбубаи ҷон», «Эй аз фурқати ту», «Ай дараи Камаров», «Менолад дилам», «Агар ба гулшан маҳи ман», «Аз чашми тобноки ту», «Ошёни булбулон» дар иҷрои овозхонҳонҳои ширинадо Ҷумъабой Қӯзиев, Шамсиддин Муҳиддинов, Луҳира Мӯминова, Фурқат Саидов, Сабоҳат Наҷмиддинова, Ҷамшед Эргашев, Дилшод Гулов, Мавзуна Маҳмадаминова, Абдувалӣ Ҷалолов, Субҳониддин Бурҳонов, Тоҷиддин Раҳимов, Саодат Умарова, Шоҳида Абдуҷалилова бо як таровату зебогии тозае пешкаши мухлисон гардиданд.

Бояд гуфт, ки дар ин ду моҳи ахир ин дуввумин консертест, ки ансамбли давлатии «Шашмақом» бо истифода аз суруду таронаҳои ин ва ё он овозхони маъруфу фақиди тоҷик барои алоқамандони ҳунари мусиқӣ доир мекунад. Чанде пештар дар ҳамин Кохи Ҷомӣ чунин консерте бо истифода аз осори шодравон Боймуҳаммад Ниёзов баргузор гардида буд.