РӮЗҲОИ ФАРҲАНГИ ҶУМҲУРИИ ИСЛОМИИ ЭРОН ДАР ҶУМҲУРИИ ТОҶИКИСТОН
Дирӯз, 25-уми март, дар чаҳорчӯбаи рӯзҳои фарҳанги Ҷумҳурии Исломии Эрон дар Ҷумҳурии Тоҷикистон дар толори бузурги Иттифоқи Нависандагони Тоҷикистон ҳамоиши гиромидошти ҳаким Абулқосими Фирдавсӣ баргузор гардид. Дар он шоирону нависандагон, ҳунармандони мусиқӣ, аҳли зиё ширкат варзиданд.
Саид Муҳаммади Ҳусайнӣ, вазири фарҳанг ва иршоди исломии Ҷумҳурии Исломии Эрон ҳозиринро бо баргузории ҳафтаи фарҳанг, иди Наврӯз табрик гуфта, нақши Фирдавсиро дар зинда нигоҳ доштани таърихи ниёгон, таҳкими эҳсоси ватандӯстиву ватандории мардуми эронинажод ва боло бурдани ифтихори миллӣ хеле бузург арзёбӣ кард.
Дар ин ҳамоиш шоирони эронӣ Яҳёи Толибиён, Парвиз Бегии Ҳабибободӣ, Сайиди Биёбонакӣ ва шоирони тоҷик устод Мӯъмин Қаноат, Раҳмат Назрӣ, Ҳақназар Ғоиб намунаи ашъори худро барои ҳозирин қироат карданд. Устод Мӯъмин Қаноат аз хотираҳои хеш дар бораи сафарҳояш ба Эрон ва таърихи эҷоди ашъори ба Эрон бахшидааш қиссаҳои ҷолибу муфидеро барои ширкаткунандагони ин маҳфил ироа кард.
Ҳозирин инчунин аз хунарнамоии Ҳунарманди мардумии Тоҷикистон Қурбоналӣ Раҳмон, гурӯҳи ҳунарии «Сомон» ва саҳнаороиҳои наққоли маъруфи Эрон Муршиди Аҳадӣ баҳраёб гардиданд.
Дирӯз инчунин дар чаҳорчӯбаи рӯзҳои фарҳанги Эрон дар Тоҷикистон аввалин маротиба дар Театри давлатии академии опера ва балети ба номи устод Садриддин Айнӣ намоишномаи коргардон ва нависандаи маъруфи эронӣ, дорандаи ҷоизаи Ибни Сино ва Шаволяи Фаронса Парӣ Собирӣ «Рустам ва Исфандиёр» баргузор гардид.
Алоқамандони ҳунари синамо бошанд имконият доштанд, ки дар Кохи Ҷомӣ филмҳои ҳунарии «Юсуф Паёмбар» ва «Мулки Сулаймон»-ро тамошо кунанд.
Рӯзҳои фарҳанги Эрон дар Тоҷикистон то 28-уми идома хоҳанд дошт.
«Рӯзгор»
