Ифшои амали қаллобе, ки бо фиреб аз се нафар 63 ҳазор доллар гирифтаву барнамегардонад
Одинаев Карими 42-сола моҳи январи соли 2016 се нафар шаҳрвандони кишварро ба доми дурӯғу фиреб кашида, 63 ҳазор доллари онҳоро гирифтаву то ҳол барнамегардонад. Дафтари матбуотии Вазорати корҳои дохилии Тоҷикистон бо интишори ин хабар гуфтааст, ки ҳодисаи қаллобӣ баъди шикояти шаҳрванд Холмуродов Эраҷ- истиқоматкунандаи кӯчаи Муҳаммадиеви пойтахт ошкор шудааст.
Дар хабар омадааст, ки рӯзи 20-уми августи соли 2019, шаҳрванд Холмуродов Эраҷ, соли таваллудаш 1984, истиқоматкунандаи кӯчаи Муҳаммадиеви пойтахт ба мақомоти милитсия арз намуд, ки моҳи январи соли 2016 дар назди чойхонаи «Роҳат», воқеъ дар кӯчаи Рӯдакии шаҳри Душанбе, шаҳрванд Одинаев Карим, истиқоматкунандаи ноҳияи Рӯдакӣ, бо фиреб ба боварии ӯ даромад, аз ӯ маблағи 20 000 доллари амрикоӣ гирифта, то ҳол барнагардонидааст.
Маълум шудааст, ки Одинаев Карим моҳи январи соли 2016 бо роҳи фиреб ба боварии сокини пойтахт Холмуродов Беҳзод даромада аз ӯ низ 20 000 доллари амрикоӣ гирифта, то ҳол барнагардонидааст.
Номбурда бо ҳамин роҳ моҳи январи соли 2016 ба боварии Раҷабов Паҳлавии 43-сола, сокини шаҳри Душанбе, даромада аз ӯ 23 000 доллари амрикоӣ гирифта, то ҳол барнагардонидааст.
Манбаъ гуфтааст аз рӯйи ин ҳодиса тафтишот оғоз шудааст. Вале гуфта намешавад, ки қалоб боздошт шудааст ва ё дар ҷустуҷӯ қарор дорад.
«Рӯзгор»