«ГАНҶИНАИ АСРОРӢ» ДАР ИХТИЁРИ ДОНИШҶӮЁН, АММО…

Дар факултети журналистикаи Донишгоҳи Миллии Тоҷикистон китобхонае бо номи «Ганҷинаи профессор В. Асрорӣ» фаъолият мекунад, ки пайваста дари он ба рӯйи донишҷӯён боз аст.

students Ин китобхона аз соли 1997-ум бо ин ном таъсис ёфта, аввалин китобҳоро пайвандони профессор марҳум Воҳид Асрорӣ ба он тақдим намудаанл. Ҳарчанд, ки пештар ин даргоҳ ҳамчун синфхонаи методӣ маълум буд, аммо ба шакли китобхона аз соли дар боло зикршуда ба кор оғоз намудааст. Рухшона Каримова, китобдори ин даргоҳ, дар сӯҳбат бо мо гуфт: «Дар китобхона асарҳои таърихӣ, илмӣ ва бадеӣ зиёданд. Айни замон дар «Ганҷинаи профессор В. Асрорӣ» зиёда аз 1502 адад китоб мавҷуд аст».

Яке аз китобҳое, ки аз ҳама бештар мавриди мутолиаи донишҷӯён қарор мегирад, «Луғоти Деҳхудо» мебошад. Ҳамин гуна китобҳои бузургони фарҳангу адаби форсӣ, масалан, «Маснавии Маънавӣ»-и Ҷалолуддини Румӣ ва дигар китобҳои нодир хидмати дӯстдорони фарҳангу илм гузошта шудаанд.

Рухшона Каримова дар идома меафзояд: «Дар ин китобхона шумораи китобҳои илмӣ нисбат ба китобҳои таърихию бадеӣ зиёд аст. Бештари ин китобҳо ба соҳаи забон ва журналистика рабт доранд. Дар «Ганҷинаи профессор В. Асрорӣ» бастаи баъзе аз нашрияҳои Тоҷикистон ба монандӣ «Ҷумҳурият», «Омӯзгор», «Ба қуллаҳои дониш» ва «Фардо» мавҷуданд, ки алоқамандон метавонанд аз онҳо истифода кунанд. Ҳамчунин дар ин боргоҳи илм рисолаи дипломии донишҷӯёни хатмнамудаи факултети журналистика нигоҳдорӣ мешавад, ки он ҳам, метавонад як сарчашмаи хубе бошад барои корҳои илмии донишҷӯён.

kitonkhona Дар ҳамин ҳол Рухшона Каримова ин нуктаро таъкид кардааст: «Имрӯз дар «Ганҷина» китобҳое, ки устодони факултети журналистика таълиф намудаанд, ҳастанд, аммо теъдоди ин китобҳо хеле кам аст. Намедонам аз чӣ бошад, ки муаллифон аз китобҳои нашршудаашон як ё ду нусха ба ин ҷо месупоранд, ки ин албатта, кам аст. Чун китобхона дар дохили факултети журналистика фаъолият мекунад, табиист, ки талабгорони ин китобҳо зиёданд».

Китобҳое, ки аз ҷониби муаллифонашон тақдим шудаанд, як гӯшаи «Ганҷина»-ро ташкил медиҳанд. Китобҳои профессор Иброҳим Усмонов Мурод Муродов мисол шуда метавонанд. Дар мавриди чӣ гуна муносибат доштани хонандагон бо «Ганҷинаи профессор В. Асрорӣ» китобдор Рухшона Каримова чунин ибрози назар намуд: «Албатта, нисбат ба солҳои қабл муносибати хонандагон, хосса донишҷӯён ба китобхона хуб шудааст. Дар давоми рӯз камаш 30-40 нафар барои ин ё он китоби лозимӣ муроҷиат мекунанд ва дастрас карда мутолиа менамоянд».

Донишгоҳи миллии Тоҷикистон яке аз беҳтарин муассисаҳои олии кишвар ба шумор меравад, ки аз соли таъсис то ба имрӯз бо кадрҳои омода кардааш, хидмати арзандаеро ба ҷо овардааст. Имрӯз қариб дар ҳама факултетҳои ин муассисаи олӣ китобхонаҳо мавҷуданд, ки барои боло бурдани маънавиёт ва савияи дониши донишҷӯён ва устодон хидматгузор ҳастанд.