Муассисаи давлатии ТВ «Сафина» ҳамчун дастгоҳи идеологии давлату Ҳукумати Ҷумҳурии Точикистон дар муддати шаш моҳи сипаригардидаи соли равон ба қадрӣ имкон чорабиниву рӯйдодҳои гуногунсатҳи давлатию ҷамъиятиро инъикос намуд.

Дар ин бора Директори муассиса Лутфулло Давлатов дар мулоқот ба хабарнигорони дохиливу хориҷӣ иттилоъ дод. Ба қавли роҳбари ин шабакаи телевизионӣ кормандони ТВ «Сафина» дар ин давра корҳои эҷодии худро асосан дар самти инъикоси бандҳои алоҳидаи Паёми солонаи Президенти Ҷумҳурии Тоҷикистон ба Маҷлиси Олии кишвар, ҷараёни баргузории ҷашнвораҳои миллӣ, аз ҷумла таҷлили бошукӯҳи 13- умин солгарди рӯзи Ваҳдати миллӣ, ки дар ВМКБ дар сатҳи хеле баланд баргузор гардид, равона намуда буданд.

Вобаста ба ин рӯйдодҳои муҳим шурӯъ аз гузоришу маводҳои иттилоотиву барномаҳои алоҳидаи таҳлиливу маърифатӣ бо ширкати коршиносони соҳа таҳия ва манзури бинандагон гардонида шуд, таъкид гардид дар нишаст.

Рӯи эфир омадани барномаҳои ҷадиду тоза ва корбасти дигаргуна дар банду басти барномаҳои доимӣ нишони ҷаҳду талоши кормандони муассиса дар самти беҳтарсозии сифати маводи пешниҳодшавандаи телевизионӣ маънидод гардид. Тарҷума ва дубляжи филмҳои гуногунжанр хуб ба роҳ монда шудааст.

Вобаста ба суоли хабарнигорон дар мавриди ҷалби кадрҳои ҷавон ба тарҷума ва овоздиҳии нақшҳо дар филмномаҳо Лутфулло Давлатов изҳор дошт, ки ТВ «Сафина» омода аст  бо ҳамаи муассисаву идораҳои омодасозии мутахассисони соҳаи фарҳангу ҳунар, шахсони алоҳида ҳамкории амиқро ба роҳ монад. Дигар паҳлӯҳои фаъолияти телевизион низ дар мулоқоти масъулини муассиса бо хабарнигорон мвриди таҳлилу баррасӣ қарор гирифт.

Лутфия Эшонқулова, АМИТ «Ховар»

Адреси доимии маводи мазкур: http://www.ruzgor.tj/matbuot/2691--lr-------.html