Таъхири дигарбораи мурофиаи Тутубалина ва Иттиҳодияҳои эҷодӣ
Мурофиаи додгоҳии иттиҳодияҳои эҷодӣ ва Олга Тутубулина аз сабаби ҳозир нашудани даъвогарони асосӣ бори дигар ба таъхир андохта шуд. Намояндаи ваколатдори сарварони Иттиҳодияҳои эҷодӣ Рустам Устобев гуфтааст, ки тибқи қонун онҳо ӯҳдадор нестанд ба мурофиа ҳозир шаванд.
Маврид ба ёдоварист, ки мақолаи муҳаррири «Азия-плюс» Олга Тутубалина бо номи «Ғайризиёиёна дар бораи зиёӣ» муҷиби эътирози иддае аз созмонҳои эҷодии кишвар, аз ҷумла Иттиҳоди нависандагон, Академияи улум шуда буд ва онҳо бо шикояти дастаҷамъӣ ба додгоҳ муроҷиат намуданд. Зиёиён мегӯянд дар мақола ба ибораи Ленин таҳқир шудаанд. Аммо ҷониби ҷавобгар бар ин назар аст, ки иддиои зиёиён ва созмонҳои эҷодӣ пояи ҳуқуқӣ надорад. Аз назари онҳо Тутубалина аз ҳуқуқи конститутсионии худ истифода кардааст ва мақола назари интиқодии ӯ ба аксуламали зиёиён ба рӯйдодҳои ҷомеа мебошад.