Шаст асари тоза кашфшудаи Мир Сайид Алии Ҳамадониро ба Тоҷикистон меоранд
Дар китобхонаи миллии шаҳри Теҳрони Ҷумҳурии Исломии Эрон 60 асари тозаи илмӣ ва фалсафии Мир Сайид Алии Ҳамадонӣ, фақеҳ ва шоири машҳури форсу тоҷик кашф шудааст. Дар ин бора ҳафтаи гузашта хабаргузориҳо истинодан ба Ҳотамшо Асозода, муҳаққиқ ва пажуҳишгари осори ин мутафаккири бузург хабар доданд.
Гуфта мешавад, ки ин кор бо дастгирӣ ва бо кӯмаки бевоситаи сафири пешини Ҷумҳурии Исломии Эрон дар Тоҷикистон доктор Алӣ Асғари Шеърдӯст амри мумкин гардидааст. Ба гуфтаи муҳаққиқ асарҳои ёфтшударо Мир Сайид Алии Ҳамадонӣ дар замони будубошаш дар Кӯлоб таълиф кардааст, вале бо роҳҳое ба Эрон бурда шудаанд. Ахиран эълон шуда буд, ки созмони ҷаҳонии ЮНЕСКО пешниҳоди Тоҷикистон дар мавриди таҷлили 3000 солагии Ҳисор, 100 солагии оҳангсози саршиноси тоҷик - Зиёдулло Шаҳидӣ ва ҷашни 700 солагии Мирсаид Алии Ҳамадониро мавриди баррасӣ қарор додааст.
Мир Сайид Алии Ҳамадонӣ аз маъруфияти хосе дар Тоҷикистон бархӯрдор аст. Бист сол пеш бо ташаббуси ҳукумати кишвар 680-солагии мутафаккири бузург ҷашн гирифта шуд ва бо қарори ҳукумат ноҳияе бо номи ӯ номгузорӣ гардид, осорхонаи адиб таъсис ёфт ва дар пули 10 сомонаи тоҷик бо акси ӯ нашр шуд.
«Рӯзгор»
