Дар Конибодом ансамбли "Мақомхонони наврас" эҳё шуд
Бо ташаббуси номзади илми санъатшиносӣ Абдувалӣ Абдурашидов дар шаҳри Конибодом вилояти Суғд ансамбли "Мақомхонони наврас" муҷаддадан эҳё шуд. Дар ин бора ба "Рӯзгор" аз дафтари матбуотии ҳукумати вилояти Суғд иттилоъ доданд.
Манбаъ ҳадафи эҳёи ансабли мазкурро наздик кардани мардум ба мусиқии ноби классикӣ ва ҷалби ҷавонону наврасон ба шинохти гузаштаи хеш унвон кард. Гуфта мешавад, ки муддати бист соли охир бо сабабҳои мавҷуд набудани шароити мусоид ин ансабл аз фаъолият монда буд. Аммо ҳоло ба муҷарради фароҳам омадани шароити мусоид мақомот тасмим гирифтанд ташаббуси эҳёи дубораи онро дастгирӣ кунанд.
Дар айни замон беҳтарин устодон ва донандагони таронаҳои классикӣ барои омӯзиши наврасон ҷалб карда шудаанд. Ҳоло 9 нафар наврасони лаёқатмандро ба тариқи озмун ба ансамбл қабул кардаанд, вале озмун ҳамоно идома дорад ва зарфи моҳҳои оянда теъдоди бештари соҳибистеъдодҳо ба он ҷалб карда хоҳанд шуд.