Маҳфили адабии Олимхон Исматӣ дар Хуҷанд

Дар шаҳри Хуҷанд маҳфили адабии шоири шинохта Олимхон Исматӣ бо иштироки ҷамъе аз ҳаводорони ашъораш, адибони вилоят ва сарояндагони саршиноси кишвар баргузор гардид. Ширкаткунандагон маҳфилро хотирмону ҷолиб арзёбӣ карданд. 

Артисти Халқии СССР Ҷӯрабек Муродов, ҳунармандони шинохта Хосияти Зарафшонӣ, Лола Азизова аз ашъори шоир таронаҳои марғуб суруданд ва ӯро муборакбод карданд. Гуфта мешавад, ки ҳудудан 15 сарояндаи матраҳи кишвар бар шеърҳои Олимхон Исматӣ оҳанг баставу  сурудаанд. Раиси Иттифоқи нависандагони вилояти Суғд Аҳмадҷон Раҳматзод, Маликнеъмат, Гулнози Тоҳириён, Озарахш, Ҷӯра Юсуфӣ суханронӣ карданд ва сабки эҷод, тозаву навгӯиҳои шоирро ситоиш карданд.

Қайд карда шуд, ки Олимхон Исматӣ бидуни шак аз ҷумлаи шоирони муваффақи ҳавзаи адабии Хуҷанд аст, ки ашъораш ҳаводорони зиёд дорад.

Бознашр аз ҳафтаномаи «Рӯзгор» №09, 05 марти соли 2014