Мулоқоти Эмомалӣ Раҳмон бо Абдулҳодӣ Арғандивол
Бино ба гузориши дафтари матбуотии Президенти Ҷумҳурии Тоҷикистон Эмомалӣ Раҳмон Вазири иқтисоди Ҷумҳурии Исломии Афғонистон, Раиси ҷониби афғонии Комиссияи муштараки байниҳукуматии ҳамкории иқтисодӣ, тиҷоратӣ, иҷтимоӣ ва техникии ду кишвар Абдулҳодӣ Арғандиволро ба ҳузур пазируфт.
Манбаъ мегӯяд, Сардори давлат рушди ҳамкорӣ бо Афғонистонро аз ҷумлаи авлавиятҳои муҳимтарини сиёсати хориҷии кишвар хондааст. Дар мулоқот доир ба бахшҳои гуногуни ҳамкории иқтисодию тиҷоратӣ, нақлиётию транзитӣ, амниятӣ ва фарҳангии ду кишвар гуфтугӯйи судманд сурат гирифт. Изҳори боварӣ карда шуд, ки баргузории ҷашни байналмилалии Наврӯзи ҷаҳонӣ ва Конфронси шашуми RECCA дар Афғонистон ба таҳкими фазои сулҳу субот ва рушди иқтисодию иҷтимоии ин кишвар мусоидат хоҳанд кард.
Доир ба роҳҳои татбиқи босамари лоиҳаҳои минтақавии зербиноӣ барои кашидани хатти барқии CASA-1000, бунёди роҳи оҳани Тоҷикистон-Афғонистон-Туркманистон, ифтитоҳи гузаргоҳҳои нави сарҳадӣ миёни Тоҷикистону Афғонистон, афзун намудани интиқоли барқ аз Тоҷикистон ба Афғонистон, кашидани лӯлаи газ аз Афғонистон ба Тоҷикистон ва дигар лоиҳаҳои пурманфиат табодули афкор сурат гирифт.
Ҷонибҳо ба мувофиқа расондани лоиҳаи Созишномаи сеҷонибаи Тоҷикистон-Афғонистон-Покистон дар бораи тиҷорати транзитиро зарур шумурданд. Дурнамои ҳамкории маърифатию фарҳангӣ умедворкунанда номида шуд. Тавре зикр гардид, ҳоло дар Тоҷикистон 234 донишҷӯй аз Афғонистон таҳсили илм доранд ва беш аз 200 нафар табибон аз Тоҷикистон ба мардуми ин кишвар хизмат мерасонанд.
Бознашр аз ҳафтаномаи «Рӯзгор» №11, 19 марти соли 2014