Ду CD-и Зиёдуллоҳ Шаҳидӣ омодаи нашр аст
CD-и оҳангҳои бастакори варзидаи тоҷик Зиёдуллоҳ Шаҳидӣ ба ифтихори садумин солгарди ҳунарманд омода мешавад.
Писари Зиёдуллоҳ Шаҳидӣ оҳангсози машҳур Толиб Шаҳидӣ гуфтааст, ки ин ду CD тавассути аъзои хонаводаи марҳум омода ва дастраси мухлисонаш мегарданд ва шомили беҳтарин асарҳои эҷодкарди ӯ мебошанд. Бастакори маъруфи Тоҷикистон Зиёдулло Шаҳидӣ агар зинда мебуд, имсол ба 100 қадам мегузошт. Вай 16-майи соли 1914 дар шаҳри Самарқанд ба дунё омадааст ва яке аз маъруфтарин бастакорони садаи 20-ум ба шумор мерафт. Операи "Комде ва Мадан"-ро, ки Шаҳидӣ соли 1959 навишта буд, аз ҷумлаи шоҳкориҳои бузурги бастакор меноманд. Қарор аст бо қарори ЮНЕСКО садумин солгарди ӯ дар сатҳи байналмилалӣ таҷлил шавад.
Бознашр аз ҳафтаномаи «Рӯзгор» №17, 30 апрели соли 2014