9 апрели соли 2009  сафири ИМА дар Тоҷикистон хонум Трейси Энн Ҷейкобсон дар шаҳри Қӯрғонтеппа якҷо  бо мири шаҳр Изатуллоҳ Зоиров дар маросими ифтитоҳи маркази фарҳангӣ-иттилоотии  мавсум ба «Гӯшаи америкоӣ» ширкат кард.

Ба гуфтаи хонум Ҷейкобсон, ки дар ҳузури нахустин муштариёни  ин марказ ба забони  тоҷикӣ  сухан гуфтааст, чунин «Гӯшаҳои амрикоӣ» дар шаҳрҳои Душанбе, Хуҷанд, Кӯлоб  маъмулан дар назди китобхонаҳо ва дигар муассисаҳои маданӣ -равшаннамоӣ  аллакай фаъолият мекунанд.  Дар назар аст, ки моҳи июни соли равон чунин «Гӯша» дар маркази Вилояти Мухтори Кӯҳистони Бадахшон шаҳри Хоруғ низ ба фаъолият пардозад.

Дар ҳоли ҳозир дар тамоми гӯшаву канори дунё, азҷумла бо шумули  кишварҳои Осиёи Марказӣ ва Афғонистон 360 чунин «Гӯшаи амрикоӣ»,  фаъолият мекунанд. «Гӯшаи амрикоӣ»-е, ки  дар кӯчаи Ваҳдат 25, шаҳри Қӯрғонтеппа  бо мусоидати  сафорати ИМА ба фаъолият шурӯъ кард, дорои Интернети ройгон, китобхона ва таҷҳизоти  зарурӣ барои тамошои филмҳо ва шунидани  суруду мусиқӣ мебошад.

Хонум Ҷейкобсон дар рафти ин сафар аз сӯйи раиси вилояти Хатлон Ғайбуллоҳ Афзалов расман ба ҳузур пазируфта шудааст.  Миёни онҳо сухан аз боби таҳкими муносибатҳои дутарафа рафтааст,- гуфта мешавад дар хабаре, ки сухангӯйи сафароти ИМА  имрӯз дастраси хабарнигорон кардааст.

«Рӯзгор»