Иди Рамазон омаду моҳи Рамазон рафт...
Иди Рамазон омаду моҳи Рамазон рафт,
Сад шукр, ки ин омаду сад ҳайф, ки он рафт.
Ҳамватанони гиромӣ, дӯстони азиз, бародарону хоҳарон!
Иди саиди Фитрро барои ҳар яки Шумо ва аҳли хонаводаатон табрику муборакбод гуфта аз Парвардигори Таборак ва Таъоло таманнои онро дорем, ки рӯзаву тоату ибодати моҳи шарифи Рамазони мову Шуморо мақбули даргоҳи Илоҳӣ намуда гуноҳони моро бо лутфу карамаш мағфират карда бошад.
Худованди бузург ба ҳурмати моҳи шариф Рамазон, хатми Қуръону тиловати оёти каломи Раббонӣ арвоҳи ҷамиъи гузаштагонро аз мо шод ва хонаи охираташонро обод кунад, сулҳу суботро дар Ватани азизи мо пойдору бардавом ҳифз намуда, мардуми азияткашидаи моро дар паноҳи исмати худ аз балоҳои заминиву осмонӣҳамеша нигаҳбон бошад.
Оҷизона пеши Худованди бузург даст ба дуъо мебардорем, ки мусалмонони дунё, новобаста аз мазҳабу ақидаи хеш ҳама бо ҳам дӯсту бародар бошанд, мухолифатро канор бигузоранду алорағми бадхоҳони дини мубини ислому мусалмонон ҳама аз як гиребони хилъати муқаддасе, ки ӯро ВАҲДАТ гӯянд, сар бурун кунанд ва ба риштаи Илоҳӣ чанг бизананду пароканда мабошанд. Илоҳо, моро бо сари баланду тани сиҳату хотири ҷамъ боз ба Рамазони дигар хушу хурсанд бирасон! Омин ё Раббалъоламин!
Илоҳо, чунон кун Ту поёни кор,
Ки Ту шод бошиву мо растагор.
Аҳли эҷоди сомонаи «Рӯзгор»
