Рӯзи Парчами Миллӣ муборак бод, дӯстони азиз!

Дар Душанбеи азизи мо тайи беш аз 26 соли даврони соҳибистиқлолӣ иншоотҳои азими маъмуриву фарҳангӣ, илмӣ, фароғатӣ- тафреҳӣ, варзишӣ, соҳаи ҳифзи сиҳӣ ва ғайра сохта ба истифода дода шудаанд, ки симои пойтахти мо тоҷиконро сол то сол зебову дилработар карда истодаанд. Ҳамаи ин иншоотҳо вазифаву рисолатеро ба анҷом мерасонанд.

Дар яке тасмимҳои сарнавиштсоз гирифта мешаванду дар дигаре одамон саломатиро барқарор мекунанд, дар саввум илму донишашонро афзун менамоянду дар чаҳорум таълиму тарбия мегиранд, дар панҷум худро ҳамчун варзишгар обу тоб медиҳанд ва ғайраву ҳоказо Яъне ҳамаи ин иншоотҳо барои ин мардуму ин миллат хидмат мекунанд.

Дар ин байн бузургтарин Парчами миллӣ , ки дар дили пойтахти азизамон ҷой гирифтаасту ба чаҳор сӯи Душанбе партавафшонӣ мекунад, низ вазифаи таърихии худро адо намуда истодааст.

Бузургтарин парчами миллӣ дар минтақа ба дилҳои ватанпарастону ватандӯстони ҳақиқӣ суруру ғурур мебахшад. Ҳар гоҳ ки онро мебинам, ба хусус аз баландиҳо, як рӯшание дар дилам пайдо мешавад, як эҳсосоти наҷибу ҳаловатбахше вуҷудамро фаро мегирад. Ҳисси ифтихор аз ин хоку аз ин сарзамин дар қалбам бештар ҷуш мезанад.

Бовар дорам, ки хидмати ин Парчами миллӣ дар он ки ҷаҳонпаҳлавон Беҳрӯзи Хоҷазода баъди 42 сол дар яке аз бузургтарин варзишгоҳҳои дунё дар байни варзишгарони 93 кишвар коре кард, ки Парчами миллии мо дар мусобиқаи гӯштии самбо дар вазни 74 кило баландтар аз парчамҳои миллии дигар кишварҳо боло бардошта шавад, кам нест.

Абадан партавафшон бод Парчами миллии Ватани азизамон!

Рӯзи Парчами Миллӣ муборак бод, дӯстони азиз!

Султони Ҳамад