БУҲРОНИ ЯМАН ФАРДО ДАР РИЁЗ ҲАЛЛ ХОҲАД ШУД

Мақомоти давлатӣ ва мухолифини Яман рӯзи чоршанбе ба манзури тасвиби роҳи ҳалли се моҳи ошӯбҳои хунини ин кишвар ба Риёз, пойтахти Арабистони Саудӣ мераванд.

Ин қарордод бо миёнҷигии кишварҳои халиҷи Форс баста хоҳад шуд. Султон Бараконӣ, муовини дабири кулли ҳизби ҳокими Яман гуфт, ҷониби давлат ҷиҳати имзои ин созишнома дар Риёз аз сӯи Саудия даъват гирифтааст. Муҳаммадсалим Басиндво, раҳбари Шӯрои миллии муколама, ки мухолифин таъсис додаанд, низ гуфт, як ҳайъати онҳо ҳам ба Риёз хоҳад рафт.

Шӯрои ҳамкории халиҷ ташкили як ҳукумати ваҳдати миллӣ таҳти раҳбарии мухолифин дар Яман ва таҳвили қудрат аз президент Алӣ Абдуллоҳ Солеҳ ба ноиби ӯ дар зарфи 30 рӯз дар ивази тазмини масунияти ӯву фарзандонашро пешниҳод кардааст. Солеҳ, ки 33 сол боз бар Яман ҳукумат меронд, рӯзи шанбе ба ин муомила ризоият дод.